Gregorius episcopus, servus servorum Dei, dilectis filiis ... de Boccon Cisterciensis ordinis et ... Simigiensi abbatibus et ... priori de Boccon Wesprimiensis diocesis salutem et apostolicam benedictionem. Exhibita nobis dilectorum filiorum ... abbatis et conventus monasterii Sancti Martini de Pannonia petitio continebat, quod cum super causa, que inter ipsos ex parte una, et . ... prepositum et capitulum Albensis ecclesie super quibusdam decimationibus et arbitrio quodam super ipsis prolato ex altera vertebatur, post diversas commissiones ad dilectum filium E(gidium) subdiaconum et capellanum nostrum tunc in Ungaria commorantem nostras litteras impetrassent; demum ipse ac magister M(anasses) archidiaconus de Sas War, in quos utrimque tamquam in arbitros procurante parte altera extitit compromissum, taliter arbitrati fuerunt, quod si dicti prepositus et capitulum obtinerent decem milia salium regalium, que tenent in Posonio a carissimo in Christo filio nostro ... illustri rege Ungarie, ab ipso concedi monasterio memorato, ita quod in eodem loco ponerent suis expensis prefatos abbatem et conventum in possessionem salium predictorum, pars monasterii ab earundem decimationum petitione cessaret. Postmodum vero, licet sales ipsos dicto monasterio rex ipse per litteras suas concesserit, tamen prepositus et capitulum supradicti nec in termino constituto, nec post illum et plures alios expectati possessionem ipsorum salium dederunt eisdem, quamvis iam dictus abbas protestatione premissa, quod non erat in possessionem inductus ab eis, quinquaginta marcas frisaticorum pro redditu salium unius anni, precibus quorundam inductus et compulsus quibusdam minis et terroribus recepisset. Cumque indulto adhuc ipsis anni spatio inutiliter, sicut prius duxerint, expectandum demum post querelas multiplices vocem ad nos appellationis emisit octavas beatorum apostolorum Petri et Pauli proximo preteritas sibi terminum prefigendo; qui tandem in nostra presentia constitutus humiliter supplicavit, ut cum iidem prepositus et capitulum conditioni non paruerint, que in arbitrio continetur, mandaremus eo non obstante de iam dictis decimationibus eidem monasterio integre responderi.||
Quocirca discretioni vestre per apostolica scripta mandamus, quatinus si vobis constiterit de premissis, cum permutatio de spiritualibus ad temporalia improbetur, predictum arbitrium et quicquid secutum est ex eo vel ob id, absque more dispendio auctoritate nostra, sublato appellationis impedimento, irritum decernatis, super decimis postmodum, dampnis et expensis, que hac occasione monasterium ipsum sustinuit, quod iustum fuerit, statuentes et facientes, quod statueritis, per censuram ecclesiasticam firmiter observari. Testes autem, qui fuerint nominati, si se gratia, odio vel timore subtraxerint, per censuram eandem appellatione cessante cogatis veritati testimonium perhibere. Si vero aliquid difficultatis emerserit, quod per vos non valeat expediri, illud ad apostolice sedis remittatis examen prefigentes partibus terminum competentem, quo per se vel procuratores idoneos compareant coram nobis, quod canonicum fuerit, recepture. Quod si non omnes hiis exequendis potueritis interesse, duo vestrum ea nichilominus exequantur. Datum Reate XIII Kalendas Novembris pontificatus nostri anno quinto. [1231. okt. 20.]