In nomine Sancte Trinitatis et Individue Unitatis. Andreas secundus, Dei gratia Hungarie, Dalmatie, Croatie, Seruie, Rame, Lodomerie rex, viris religiosis ... abbati et conventui monasterii Sancti Martini de Sacro Monte Pannonie et eorum successoribus in perpetuum. Per presens scriptum cunctis nunc et in posterum facimus manifestum, quod inclite recordationis dominus Bela pater noster misericordie provocatus affectu tres naves saliferas liberas contul(it) ad substentationem fratrum ibidem Deo servientium ea videlicet libertate privilegiatas, ut ab ipso salifodine loco usque ad iam dictum montem Pannonie tam per aquam, quam per terram nemo (!) de salibus in illis tribus navibus delatis tributum exigere vel aliqua alia dampnifica exactione audeat eos impedire. Et nos postmodum, quorum interest, non solum paterne hereditatis, sed etiam esse christianitatis heredes, eandem helemosinam a patre nostro collatam eidem monasterio sub eodem libertatis tenore perpetuo confirmavimus. Et quia in ipso loco salifodine predictum monasterium Beati Martini minus libere consueverat predictos sales accipere et a salifodinariis vel aliis super ipsis salibus multimodis exactionibus fatigari eo, quod libertas ipsa monasterio vestro concessa in privilegio patris nostri minus plenarie erat expressa, de nostra largitione eidem monasterio expressiorem concessimus libertatem a patre nostro et a nobis monasterio vestro concessam, nunc et in futurum ratam habemus et ex certa scientia confirmamus, promittentes per nos nostrosque successores ea omnia observare, que superius sunt expressa et in privilegiis vestris similiter continentur, et iuxta compositionem, que inter dominum Iacobum electum Prenestinum apostolice sedis legatum ex una parte et nos ex altera provide intercessit, hanc damus vobis et vestris successoribus libertatem: ut de predictis salibus ad usus vestros teneatis tantum, quantum prelatus vester in anima sua dixerit salinariis nostris, ceteri vero vel pars ipsorum, cum vobis fuerint persoluti, libere et absque ulla contradictione et tributo in domo vestra sub sigillo salinariorum nostrarum et prelati vestri, qui pro tempore fuerit, deponantur, depositique serventur usque ad octavas Sancti Stephani regis. Et tunc ab illo die usque ad nativitatem Beate Virginis Marie faciemus vobis solvi argentum pro salibus, quos tunc apud vos habetis, pro quolibet timino salium aquaticorum octo marcas. Et si in illo termino nos aut salinarii nostri sales ipsos non emeremus et vobis et ecclesie vestre argentum secundum extimationem predictam non solveremus, ex tunc omni tempore omnes illos sales libere in proprium usum ecclesie vestre percipiatis et vendatis iuxta vestre arbitrium voluntatis. Et omne lucrum, quod deberemus nos vel alius rex, qui pro tempore fuerit, vel ipsi salinarii inde percipere, totaliter cedat in usus ecclesie vestre, nec a salinariis ipsis veteribus vel novis aut aliis personis permittemus vos modo aliquo molestari, nec nos ipsi molestabimus, quin possitis, quicquid vobis placuerit, facere semper de salibus ipsis, ex quo in dicto termino non fuerit vobis pecunia persoluta. Idem dicimus de secundo termino, videlicet quod a festo Beati Nicolai usque ad festum Beati Thome apostoli pro salibus, quos in domo vestra apud vos habebitis sub sigillo salinariorum et prelati vestri, faciemus vobis solvi argentum secundum extimationem superius annotatam. Quod si factum non fuerit, volumus, quod idem fiat, quod in casu superiori de salibus primi termini dictum est. Argentum vero, quod vobis faciemus persolvi, erit in bonis frixaticis vel in argento, cuius decima pars comburetur. Ut autem hec nostre confirmationis et concessionis et libertatis pagina robur perpetue obtineat firmitatis, contra quam scienter non veniemus nec contra alia privilegia, monasterio vestro a nobis aut predecessoribus nostris indulta, regio sigillo eam volumus communiri, statuentes, ne nos aut nostrorum aliquis successorum vel aliquis alius contra ea quicquam audeat attemptare vel ei ausu temerario contraire. Datum per manus reverendi Ugulini Colocensis archiepiscopi et aule regie cancellarii, anno dominice incarnationis Mo CCo XXXIIIo, indictione VI., Kalendis Octobris, venerabili Roberto Strigoniensi archiepiscopo existente, Cleto Agriensi, Gregorio Iauriensi, Bricio Waciensi, Bartholomeo Wesprimiensi, Stephano Zagabriensi, Bartholomeo Quinqueecclesiensi, Renaldo Ultrasiluani, Buchi Cenadiensi et Benedicto Waradiensi episcopis, ecclesias Dei feliciter gubernantibus, Dionisio comite palatino, Demetrio aule nostre curiali comite et Bachiensi, Nicolao filio Bors Suppruniensi, Latisslao (!) Mussuniensi, Petro fratre Marcelli Nitriensi, Stephano Bichoriensi comitibus, Nicholao magistro tavarnicorum et comite Posoniensi, Mauritio dapiferorum, Michaele agasonum, Bagin pincernarum magistris et aliis quam pluribus comitatus tenentibus, regni nostri anno tricesimo. [1233. okt. 11.]