Reverendis in Christo patribus U[grino] Dei gratia archiepiscopo Colochensi et suis suffraganeis nec non et aliarum ecclesiarum prelatis I[acobus] divina miseratione episcopus Nitriensis et magister S[aulus] archidiaconus eiusdem loci reverentiam tam debitam quam devotam cum orationum suffragiis. Vestra noverit paternitas, litteras domini legati I[acobi] electi Prenestini recepisse sub hac forma:||
Venerabili in Christo patri ... Dei gratia Nitriensi episcopo et dilecto in Christo ... archidiacono eiusdem loci Iacobus miseratione divina Prenestinus electus apostolice sedis legatus salutem in Domino. Cum olim dilecti in Christo ... abbas et conventus Sancti Martini de Sacro Monte Pannonie super ecclesia Sancti Spiritus cum quibusdam palatiis et aliis pertinentiis ad eandem coram diversis iudicibus a sede apostolica delegatis, tandem coram nobis contra nobilem virum Fabianum militem Strigoniensis diocesis moverint questionem ... Datum apud monasterium Sancti Martini III Kalendas Martii. Quod si non omnes hiis exequendis potueritis interesse, alter vestrum ea nichilominus exequatur. [1234. febr. 27.]||
Cum igitur nobis constiterit evidenter, quod nobilis vir Fabianus memoratus nondum plene restituerit possessionem et quedam pertinentia ad ecclesiam Sancti Spiritus abbati et conventui supradictis, utpote quia in pertinentiis predicte ecclesie et palatii cum uxore et familia sua contra suum iuramentum hactenus indebite commoratur et sic in sententiam excommunicationis latam inciderit ipso facto: auctoritate, qua fungimur, ipsum excommunicatum denunciamus, mandantes paternitati vestre, ut ipsum excommunicatum evitetis et faciatis a vestris subditis arcius evitari, ne censura ecclesiastica videatur omnino contempni.