Capitulum Iauriensis ecclesie universis presentibus et futuris presentem paginam inspecturis salutem in salutis largitore. Vestra noverit universitas, quod cum dignum sit nos iustis petentium precibus consensum facilem prebere, Urias abbas Sancti Martini totumque eius capitulum a nobis pie postulavit litteras suas testimoniales nostris litteris confirmandas super eo videlicet, quod quidam P. quondam comes, monachus factus quendam servum suum nomine Bonum contulit ecclesie Sancti Martini pulsatorum servitio perpetuo serviturum. Quarum litteras (! litterarum) series talis est:||
Universis Dei gratia presentem paginam inspecturis P. quondam comes, postremum vero in ecclesia Sancti Martini de Sacro Monte Pannonie monachus factus, salutem in salutis auctore. Quoniam iuxta dictum apostoli ante tribunal Christi sumus astaturi, recipientes, prout quisque gessit, sive bonum sive malum, huius tremendi examinis diem misericordie volens prevenire operibus, quendam meum servum nomine Bonum pro anima mee genitricis et mea iam dicte ecclesie Sancti Martini in pulsatorem contuli, cuius meipsum usque ad finem vite mee obtuli servitio. Quod tam presentibus, quam futuris notum esse desidero; et ne presentis libelluli pagina in posterum alicuius possit violari lenocinio, basilice pluries dicte capituli feci sigillo roborari servandam eandem in eiusdem camera perpetuo. Actum est autem hoc presente Uria abbate, Hemerico decano et Clemente custode existentibus.||
Quod ut robur firmitatis obtineret perpetue, presenti pagina (!) sigilli capituli nostri munimine roboratam ad maiorem cautelam fecimus eternari. Anno Domini Mo CCo XXXo IIII. [1234.]