In nomine Sancte Trinitatis et Individue Unitatis. Andreas Dei gratia Hungarie, Dalmatie, Croatie, Rame, Servie, Galitie Lodomerieque rex in perpetuum. Quoniam temperata nostris temporibus nostri regiminis clausulis circumscripta et ordinem et tutelam a nostro expectant patrocinio, venerabilis Uros abbas Sancti Martini de monte Pannonie ad nostram accedens presentiam quoddam nobis obtulit privilegium domini Gregorii pape noni super omnibus possessionibus per se seu per alios aquisitis et super ecclesie sue libertatibus confectum, tamquam vir discretus ac providus et in postremum precavens, a nobis instanter postulavit illud, idem privilegium in perpetuum confirmari. Cuius nos honestis ac legitimis petitionibus ex consensu filiorum nostrorum et iobagionum nostrorum consilio communicato volentes satis facere, privilegium supradictum regia auctoritate confirmavimus et ad stabilitatis cautelam firmioris de verbo ad verbum in presenti pagina iussimus annotari. Cuius tenor talis est:||
Gregorius episcopus, servus servorum Dei, dilectis filiis (Urie) abbati Sancti Martini super Pannoniam eiusque fratribus tam presentibus quam futuris regularem vitam professis in perpetuum. Effectum iusta postulantibus indulgere tam vigor equitatis, quam ordo exigit rationis, presertim quando petentium voluntates et pietat (!) adiuvat et iustitia non relinquit. Eapropter, dilecti in Domino filii, vestris postulationibus libenter annuimus et prefatum monasterium Sancti Martini supra Pannoniam situm ad ius et proprietatem apostolice sedis nullo pertinens mediante, in quo divino estis mancipati, ad exemplar felicis recordationis I(nnocentii) [1216. jún. 13.] et H(onorii) [1225. máj. 26.] predecessorum nostrorum sub Beati Petri et nostra protectione suscipimus et presentis scripti privilegio communimus, inprimis siquidem statuentes, ut ordo monasticus ... inviolabiliter observetur. Preterea quascunque possessiones, quecunque bona ... partem quoque quam habetis in villa et terra de Nema cum ecclesia omnium sanctorum, villam de Renke et de Chichou et de Gamas, de Socrou et de Carl (!) predia, capellam Sancti Iacobi in nemore de villa Wicha cum terra ad quatuor aratra et silva et cum duodecim mansionibus civilium de comitatu Symigiensi et tertiam partem tributi et decima totius comitatus Symigiensis et tertiam partem tributi totius comitatus Posoniensis et villam Uduorch civilium de Nitria cum terra et silva ad duodecim aratra et cum viginti mansionibus et villam de Bille civilium de Zulugageur cum terra ad duodecim aratra, cum molendinis et arundinetis circa fluvium Fyzeg cum duodecim mansionibus, libertates quoque et iura ... manere sanctimus ...||
Fac mecum Domine signum in bonum. Bene valete!||
Ego Gregorius catholice ecclesie episcopus subscipsi. Ego Iohannes Sabinensis episcopus ss. Ego Iacobus Tusculanensis ep. ss. Ego Thomas tituli Sancte Sabine presbyter cardinalis ss. Ego Iohannes tituli Sancte Praxedis pr. card. ss. Ego Guifredus tituli Sancti Marci pr. card. ss. Ego Sigenbaldus tituli Sancti Laurentii in Lucina presb. card. ss. Ego Stephanus Sancte Marie trans Tiberim tituli Calixti presb. card. ss. — Ego Ramerius Sancte Marie in Cosmidin diaconus cardinalis ss. Ego Romanus Sancti Angeli diac. card. ss. Ego Rainaldus Sancti Eustachii diac. card. ss.||
Datum Spoleti per manum magistri Bartholomei sancte Romane ecclesie vicecancellarii VIIII Kalendas Iulii, indictione quinta, incarnationis dominice anno Mo CCo XXXo IIo, pontificatus vero donni (!) Gregorii pape VIIII. anno sexto.||
Nos igitur ad abundantiorem rei evidentiam et fidei cautelam amplioris, ut presens confirmatio a regia liberalitate iuste ac legitime facta nullis umquam temporibus calumnia vel oblivione mediante in irritum possit revocari, presentem concessimus paginam duplicis sigilli nostri munimine in perpetuum roboratam. Datum anno dominice incarnationis Mo CCo XXXo IIIIo, et regni nostri XXXo Io.