Gregorius episcopus, servus servorum Dei, venerabili fratri ... episcopo Geuriensi et dilectis filiis ... abbati de Bochon Cisterciensis ordinis et ... preposito Orodiensi Vesprimiensis et Cenadiensis diocesis salutem et apostolicam benedictionem. Significantibus dilectis filiis ... abbate ac conventu monasterii Sancti Martini de Pannonia nobis innotuit, quod cum Fabianum militem Strigoniensis diocesis super eo, quod ecclesiam Sancti Spiritus, terras, prata, molendina, nemora, servos, palatia et alias res ipsorum contra iustitiam detinebat, post varias commissiones ad iudices diversos a sede apostolica impetratas, primo coram dilecto filio E(gidio) subdiacono et capellano nostro tunc in Ungaria existente, et postmodum coram venerabili fratre nostro ... Penestrino episcopo tunc apostolice sedis legato auctoritate nostra traxissent in causam, idem miles in ipsius legati presentia recognoscens ad monasterium pertinere predicta et prestito iuramento promisit ea monasterio predicto restituere ac nullatenus molestare illud de cetero super ipsis, lata in postgarantiam (?) de voluntate sua per dictum episcopum excommunicationis sententia, si contra presumeret attemptare. Et tandem premissa restituens (eis), iuramento et sententia ipsa contemptis, eos super hiis fortius solito molestaret capiendo monachos et conversos, vulnerando servos ipsorum et quedam edificia monasterii ac domos quorundam suorum hominum incendio devastando, venerabilis frater noster ... Nitriensis episcopus eiusque college, ad quos super observatione ipsius sententie ipsi nostras litteras impetrarunt, iam dictam excommunicationis sententiam mandaverunt usque ad satisfactionem servari condignam et eum excommunicatum publice nunciantes arcius e(vitari). Verum venerabilis frater noster ... Colocensis archiepiscopus non solum non vitavit eundem in locutione ac mensa et officiis sibi comunicando divine (?), verum etiam ipsos predicta ecclesia, ad desiderium illius totus accedens, eiectis inde monachis et conversis, per violentiam spoliarit proventus eius in usus proprios convertendo. Quia vero nobis non constitit de premissis, discretioni vestre per apostolica scripta mandamus, quatinus (evocatis), qui fuerint evocandi et auditis hinc-inde propositis, quod iustum fuerit, apellatione postposita statuatis, facientes, quod decreveritis auctoritate nostra firmiter observari. Quod si non omnes hiis exequendis potueritis interesse, duo vestrum ea nichilominus exequantur. Datum Viterbii XV. Kalendas Decembris, pontificatus nostri anno nono. [1235. nov. 17.]