Universis Christi fidelibus presentem paginam inspecturis magister Michael filius Apa comitis, Chepanus filius Petri, Marcellus de Berencha, Hemericus de Bana, Dionisius de genere Rusd, Oltus de Vigman, Marcellus de genere Olup, Benka de genere Gug, comites cum omnibus cognatis eorum, et ceteri quam plurimi in diocesi Iauriensi et Kamariensi existentes salutem in Domino. Vestre nobilitati significamus, quod cum quibusdam diebus assignatis iuris ordine ac iuxta mores patrie disposituri processissemus inter ecclesiam Sancti Martini ex una, et magistrum templi ex altera super controversiam terre Zeuleus, pars utraque sic se nostro arbitrio obligavit, ut si qui eorum nostrum arbitrium refutaret, centum marcas parti adverse solvere teneretur. De qua terra nos huiusmodi fecimus dispositionem; ut ipsi primitus terram regine de communi assensu restaurarent, ita quod de quadraginta funiculis, quod vulgo fiu vocatur, sex darentur populis regine, et reliqua divideretur ab ecclesia Sancti Martini per medium; et medietatem templari acciperent, et insuper sexaginta iugera; de silva vero nec cruciferi, nec populi regine partem aberent, nisi ecclesia Sancti Martini, sed stagnum tantum commune esset cum cruciferis. Vineas vero, si qui primi plantaverant super illius terre promuntorio, idem ipsi possiderent; sed amplius sine assensu ecclesie Sancti Martini plantare non permitterentur. Ad cuius terre divisionem de nostris sociis misimus, scilicet Marcellum, Chepanum, Oltum, Benkam comites, qui utrisque partibus diem assignaverunt ad terram dividendam. Ad quem die assignato decanus ecclesie Sancti Martini cum quibusdam fratribus et iobagionibus comparuit. Ubi dictus magister nec comparuit, nec loco sui misit; sed solummodo unus de iobagionibus prestetit, qui super divisione terre a nobis iustitie postulabat complementum. Cuius petitioni non annuimus sine litteris domini sui, sed iterato sibi terminum prefiximus. Ad quem unus frater accessit de templariis, cui cum satisfacere voluissemus, huiusmodi intulit verba, quod nos mediam partem dicte terre sibi traderemus, et insuper sexaginta iugera. Nos vero eius petitioni satisfacere non valentes, quia cum dominus abbas voluisset iustitiam facere populis regine, ipsi noluerunt, et sic populi regine inspecta iniustitia adverse partis nos proibuerunt, et taliter iustiori parti satisfacere nequivimus. Verum quia in terminibus premissis in eis fore nullam iusticiam prospeximus, consilio collegi nobilium et assensu ad personam propriam magni magistri nostras litteras transmisimus, ut se nostro conspectui presentaret satisfaciens. Qui etiam abbate comparente cum fratribus, ipse non comparuit, sed loco suo fratrem suum misit; qui frater dura cervice existens, et ad collegium nobilium et locum assignatum, scilicet ad ecclesiam Sancte Margarete venire contempsit; similiter sequenti die ad ecclesiam Sancte Crucis de Bana vocatus venire denegavit; et sic nullam iustitiam inter eos facere potuimus. Huius facti nos testes sumus et testimonium peribemus, et has litteras sigillis quondam comitum sigillavimus, scilicet Apa, Marcelli, Ccepani, Dionisij; quia omnes propria sigilla non habemus.