In nomine Sancte Trinitatis et Individue Unitatis. Bela Dei gratia Hungarie, Croachie, Dalmatie, Rame, Seruie, Galitie, Lodomerie Cumanieque rex in perpetuum. Urias abbas monasterii Sancti Martini de Sacro Monte Pannonie a nobis devote petiit et instanter, ut privilegia, que pro immunitatibus et libertatibus predicti monasterii a sede apostolica habuit, transcribi faceremus et eorum exemplaria nostri sigilli karactere muniremus, quia cum frequenter ad diversa trahatur iudicia, periculosum existeret propter viarum discrimina et alia contingentia in quibuscumque iudiciis principale privilegium exhibere. Nos igitur ipsius iustis precibus grato concurrentes assensu, annotationem domini Innocentii pape tertii super privilegio felicis recordationis sancti regis Stephani et sententiam eiusdem domini I(nnocentii) pape latam contra ... episcopum Vesprimiensem pro decimis Symigiensis comitatus per fidelem cancellarium nostrum Mathiam prepositum Zagrabiensem inspici fecimus et rescribi atque sigilli nostri munimine insigniri. Quorum tenor talis est:||
Innocentius episcopus servus servorum Dei dilectis filiis ... abbati et conventui Sancti Martini de Pannonia salutem et apostolicam benedictionem. Cum inter vos et venerabilem fratrem nostrum Vesprimiensem episcopum super decimis comitatus Simigiensis et rebus aliis longa coram nobis controversia verteretur, vos ad iuris vestri defensionem privilegium Sancti Stephani regis produxistis, quod idem episcopus multis modis nisus est inprobare. Sed vobis e contrario diversis racionibus resistentibus ipse tandem in sua intentione defecit. Ne igitur ipsi privilegio ulterius possit opponi vicium falsitatis, illud quod contradicto iudicio comperimus esse verum, de verbo ad verbum presenti pagine iussimus annotari. Cuius tenor talis est:||
In nomine Domini Dei summi. Stephanus superna providente clemencia Vngarorum rex. Credimus et vere scimus, si locis divino cultui mancipatis ... Tertia pars de Poson. (!)||
Nulli ergo omnino hominum liceat hanc paginam nostre annotationis infringere vel aei (!) ausu temerario contraire. Si quis autem hoc attemptare presumpserit, indignationem omnipotentis Dei et Beatorum Petri et Pauli apostolorum eius se noverit incursurum. Datum Ferentini V. Kalendas Augusti, pontificatus nostri anno octavo decimo. [1215. júl. 28.]