Dionisius Dei gratia palatinus et comes de Zounuk et Stephanus magister prepositus Bachiensis et aule regie cancellarius universis presentes litteras inspecturis salutem in omnium Salvatore. Noscant presentes et agnoscant posteri, quod cum dominus Bela rex illustris causam, que vertebatur inter episcopum Wesprimiensem et capitulum eiusdem loci ex una parte, et abbatem et conventum Sancti sancti (!) Martini de Pannonia ex altera, vice sua nobis commisisset audiendam et fine debito terminandam, in die assignato idem abbas procuratoribus partis adverse astantibus opposuit, quod ecclesia sua per episcopum predictum et capitulum eius in multis gravaretur et dampnificaretur, scilicet in spoliatione decimationum quindecim villarum, quarum nomina sunt hec: in Zala duarum villarum Hegmogos et Kopulch donatarum a sanctis regibus Stephano et Ladizlao; item in comitatu Simigiensi trium villarum nomine Kolombuk, Chernec et cognatis suis pertinentium, et Grezi et Primortun et Acha ad episcopum dictum pertinentium, quarum decimas episcopus vendicabat; item aliarum villarum citra et ultra et iuxta fluvium Fuk existentium duarum nomine Kustan et duarum nomine Lusta et Helias et Mors et Acha, quarum decimas capitulum Wesprimiense vendicabat. Nos autem auditis propositionibus et allegationibus partis utriusque et privilegiis Romanorum pontificum et sancti regis ex parte abbatis Sancti Martini exibitis et diligenter inspectis consilio accepto prudentum virorum, sociorum et assessorum nostrorum, magnatum scilicet Hungarie, adiudicavimus et statuimus decimationes predictarum villarum cedere iure ecclesie supradicte in perpetuum, pro quantitate autem dampnorum illatorum et fructuum perceptorum abbati predicto cum duobus fratribus suis prestare sacramentum, si auderent secundum statum sui ordinis, pro centum scilicet et viginti marcis, pro cuius pecunie solutione tres terminos assignavimus, super qua nostras alias litteras dedimus memoriales. Ut igitur huius rei geste series acta coram nobis duret in posterum et robur eternitatis optineat, nec aliquorum calumpnia seu maligna intentione queat irritari, presentes litteras concessimus sigillorum nostrorum munimine roboratas. Datum anno Domini millesimo ducentesimo tricesimo octavo. [1238.]