Nos L(adislaus) comes Symigiensis notificamus omnibus presentes literas inspecturis, quod U(rias) abbas monasterii Sancti Martini de Sacro Monte Pannonie presentavit nobis literas illustrissimi B(ele) regis et D(ionisii) palatini et comitis de Counuc, quibus precipiebatur, ut decimas abbatis et fratrum Symigiensium et populorum eorumdem et quorumdam villarum, quas D(ionisius) palatinus et comes de Counuc auctoritate domini regis iuris ordine servato predicto abbati Sancti Martini decimas solvere adiudicavit, quas videlicet episcopus Vesprimiensis in nostro comitatu iniuste decimabat, nostro adiutorio exigi faceremus et omnium aliorum; sed quia ipsas literas retinuimus nobis, placuit ad petitionem sepedicti abbatis Sancti Martini earumdem exemplaria sub nostro sigillo ad memoriam conservari. Tenor igitur earum talis est:||
B(ela), Dei gratia rex Ungarie fideli suo L(adislao) comiti Symigiensi salutem et gratiam. Mandamus fidelitati vestre firmiter precipientes, quatenus omnes decimas quarumcumque villarum de parrocia tua, quas abbas Sancti Martini de Sacro Monte Pannonie cum literis dilecti ac fidelis nostri D(ionisii) palatini sibi iustificatas esse ostenderit, eidem abbati et nulli alii persolvi facias sine contradictione et dilatione.||
Tenor literarum palatini talis est:||
Nos D(ionisius) palatinus et comes de Counuc firmiter precipimus vobis, curiali comiti et hodnogio castri Symigiensis, quatenus homini nostro Iaco comiti de Iula detis vires et adiutorium ad accipiendas decimas ecclesie Sancti Martini super illos, qui contra iustitiam actenus dare rennuerunt de suis propriis cellariis et horreis.