Universis presentium notitiam habituris capitulum ecclesie Budensis salutem in Salvatore omnium. Unicum est oblivionis remedium scripture testimonium, quod calumpniis imponit silentium et contentionis nodum explicat emergentem. Exinde ad notitiam universorum volumus pervenire, quod Herruh de villa Chuntey accedens ad nostram presentiam corporaliter confessus est, quod cum ipse heredum successione caruisset, ecclesiam Beati Martini de monte Pannonie sibl adoptavit in heredem, se et predium suum, cui nomen Chuntey, cum terra, feneto, silva, piscina cum Danubio et alia piscina in Danubio existenti, que vulgo Tona dicitur, et cum aliis utilitatibus, que omnia ipsum in prenominato predio contingunt, eidem ecclesie offerendo perhenniter possidenda, tamen quamdiu Herruh vixerit, utilitates et fructus prefati predii percipiet et habebit, sed post mortem ipsius ecclesia Beati Martini omnia supradicta iugiter possidebit. E converso venerabilis pater Uryas abbas et universus ecclesie Beati Martini conventus tributa de foro et de portu in Budrug, que ecclesia Sancti Martini percipere consuevit, cum stagno et piscatoribus in Chuntey existentibus commiserunt eidem Herruh ad procurandum, dantes predictam possessionem in manus ipsius, ut utilitates et fructus percipiat ipsius possessionis et ecclesie supradicte, sicut divina sibi inspiraverit gratia, de predictis provideat et disponat. Ut igitur series prenarrate donationis firma et inconcussa perseveret, ad petitionem tam predicti Herreh, quam etiam abbatis et conventus ecclesie antedicte condescendentes ipsam donationem presentis scripti patrocinio et sigilli nostri munimine duximus perhempnandam, Iona cantore, Thoma custode, Iohanne decano et ceteris existentibus. Actum anno Domini M.CC.XL. [1240.]