Capitulum Vesprimiensis ecclesie omnibus Christi fidelibus presentes litteras inspecturis salutem in domino Iesu Christo. Universitati fidelium presentium tenore volumus fieri manifestum, quod nos recepimus litteras domini R(olandi) palatini et comitis Posoniensis sub hac forma:||
Nos Rolandus palatinus et comes Posoniensis omnibus presentes litteras inspecturis duximus significandum, quod cum Iacobus abbas ecclesie Sancte Marie de Demunk una cum patronis eiusdem ecclesie, Martino videlicet filio Thome, Gregorio et Fabiano filiis Merse Martinum filium Papa coram nobis convenissent, proponebant contra ipsum, quod quandam terram dicte ecclesie Kamund vocatam ad tria aratra sufficientem pariter cum feneto et portione aque, quam habet in Morzol, cum servitoribus eiusdem ecclesie super eadem terra comorantibus (!) indebite occupasset et detineret. Contra quos Martinus memoratus respondebat, quod illa terra sua semper fuisset et esset hereditaria et eiusdem terre incole sui essent libertini et semper fuissent ex iure hereditario. Et cum ipsa lis mutuis altercationibus coram nobis diu fuisset ventilata, postmodum ipsam causam, sicut ordo rei exigebat, ad examen duelli iudicavimus; et cum in termino partibus asignato pugiles iam positi essent in area certaminis ambigui, permittente domino Bela rege Hungarie et aliis probis viris mediantibus talis facta fuit compositio inter partes, quod terra Kamund antedicta relinqueretur ad ius ecclesie memorate pariter cum incolis eiusdem terre; ita tamen, quod pretium illius terre secundum estimationem virorum comprovincialium abbas deberet refundere Martino nominato; de incolis autem super eadem terra existentibus pro singulis singulas marcas idem abbas dicto Martino persolueret more libertinorum; sed viginti homines ex eisdem cederent ad ius ecclesie antedicte sine aliqua redemptione. Completis igitur terminis ad faciendam solutionem secundum formam compositionis, dictus abbas ab una parte et Martinus ex altera nostro se representantes conspectui, idem Martinus coram nobis viva voce exposuit, quod abbas predictus ab universa solutione sibi debita iam esset expeditus, et ex parte abbatis nichil amplius sibi restaret faciendum. Nos vero iustitiam cause considerantes, terram sepedictam cum incolis eiusdem terre, videlicet servitoribus ipsius ecclesie ad ius et proprietatem sepedicte ecclesie statuimus perpetuo iure possidendam. Quorum servitorum nomina sunt hec: Ivan, Mathe et filius suus Petrus, Thomas et filii sui, Thimoteus videlicet, Andreas, Syle et Buhtus; item Fernes et Marcus; item Moyk et filii sui Laurentius, Voccha, Much et Chege; item Nicolaus filius Laurentii; item Darka et filius eiusdem Mura; item Gregorius et filius eiusdem Farkasius; item Fabianus; item Michael, Cheke, Emirih, Pouka, Karachun et Panka filii Bana; item Thymodeu et Micochu filii Thymotei; item Salomon, Benedictus, Beund et Solka filii Damse; item Benedictus filius Salomonis; item Chepkud et filii sui Mok videlicet, Mogd, Mortunus, Pentuk et Zukch; item Zuna, filius Vocha. Ut autem series coram nobis rei geste memorie posterorum possit recolligi, cum fuerit necesse; et ne sepedictus Martinus aliquam questionem litis, vel filii sui, heredumve successores aut cognati sui possint movere processu temporum contra sepedictam Ecclesiam Sancte Marie Demunk pro terra Kamuud seu incolis eiusdem terre, litteras presentes sepedicto abbati concessimus sigilli nostri munimine roboratas, pristaldo nostro Brazlov de Chouuta huius cause existente. Datum Posonii in dominica Invocavit anno dominice incarnationis Mo CCo Lo secundo. [1252. febr. 18.]||
Nos igitur ad maiorem huius rei confirmationem, ne inter prenominatas p(ar)tes super eodem facto lis aut questio aliqua possit suscitari, litteras nostras iuxta tenorem earundem litterarum concessimus sigilli nostri munimine roboratas. Datum per manus magistri Roberti lectoris nostri anno Domini Mo CCo Lo secundo, venerabili in Christo patre nostro Zlaudo episcopo, Henrico preposito, Symeone cantore, Iohanne custode existentibus. [1252.]