Innocentius episcopus, servus servorum Dei, dilectis filiis abbati et conventui monasterii Sancti Martini in Pannonia, Iauriensis diocesis, salutem et apostolicam benedictionem. Licet is, de cuius munere venit, ut sibi a fidelibus suis digne ac laudabiliter serviatur, de habundantia pietatis sue, que merita supplicum excedit et vota, beneservientibus multo maiora retribuat, quam valeant promereri, nichilominus tamen desiderantes Domino reddere populum acceptabilem, fideles Christi ad complacendum ei, quasi quibusdam illectivus muneribus, indulgentiis scilicet et remissionibus invitamus, ut exinde reddantur divine gratie aptiores. Cupientes igitur, ut monasterium vestrum congruis honoribus frequentetur, omnibus vere penitentibus et confessis, qui monasterium ipsum in festo Beati Martini et in die dedicationis eiusdem monasterii venerabiliter visitarint de omnipotentis Dei misericordia et Beatorum Petri et Pauli apostolorum eius auctoritate confisi, quadraginta dies annis singulis de iniuncta sibi penitentia misericorditer relaxamus. Datum Mediolani, VI. Kalendas Augusti, pontificatus nostri anno nono. [1251. júl. 27.]