Capitulum ecclesie Geureinsis universis Christi fidelibus presentes litteras inspecturis salutem in auctore salutis. Ad universorum notitiam tenore presentium volumus pervenire, quod in Medio Quadragesime [1258. febr. 27.] Laurentius decanus et Martinus curialis comes monasterii Sancti Martini de Sacro Monte Pannonie pro domino Favo abbate et conventu Sancti Martini de Sacro Monte Pannonie ex una parte, Peteu, Daniel, Alnuz, Bohas, Iaco et Symun ac alii eius consanguinei, iobagiones scilicet castri Zolgageuriensis in villa Guler ex altera in nostra existentes presentia exhibuerunt nobis duo paria litterarum memorialium domini nostri B(ele) regis illustris Hungarie, quarum tenor talis est:||
Datum pro memoria, quod F(avus) abbas Sancti Martini in Medio Quadragesime, Peteu et eius consanguineis iobagionibus castri Zolgageuriensis de villa Guler pro terra Zamtou, que dictis iobagionibus Zolgageuriensibus titulo emptionis fuerat devoluta, iuxta nostram sententiam debet viginti quinque marcas solvere et duas pro iudicio regali eorum portionem contingentes cum denariis regalibus ad pondus vel argento decime combustionis coram [capit]ulo Geuriensi; prefatus vero Peteu et eius consanguinei in ipsa Media Quadragesima privilegia super predicta terra Zamtov per monasterium Sancti Martini et capitulum Ieuriense confecta coram eodem capitulo abbati restituere supradicto, si poterunt rehabere; si vero rehabere non potuerit, dabunt eidem abbati litteras nostras et capituli Ieuriensis super eo, quod littere Salomonis abbatis et conve[ntus] Sancti Martini ac capituli Ieuriensis super contractu predicte terre confecte ubicunque in iudicio fuerint exhibite, irrite et casse penitus habentur; quod nisi fecerint, ipsa terra absque pecunia abbati perpetuabitur antedicto. Si vero abbas in solutione prefate pecunie negligens extiterit, eandem terram iidem iobagiones Zolgageurienses possidebunt contradictione aliqua non obstante. Ceterum memoratus Peteu et eius consanguinei hedificia sua usque quindenam Beati Georgii [máj. 8.] de terra transferent supradicta; sata vero sua autumpnalia pacifice pro se recipient tempore congruo sine dampno. Datum prope Budam [in] Chepel in crastino Luce evangeliste. [1256. okt. 18.]||
In prefato autem Medio Quadragesime dictis Laurentio decano et Martino curiali comite ex una parte, Peteu etiam et suis consanguineis antedictis, iobagionibus scilicet Zolgageuriensibus de villa Guler in nostra presentia constitutis, idem Laurentius decanus et Martinus curialis comes pro dicto domino Favo abbate Sancti Martini de Sacro Monte Pannonie et conventu existentes illas viginti quinque marcas pro terra Zamtov et duas pro iudicio regali portionem dicti Peteu et suorum consanguineorum contingentes cum denariis regalibus ad pondus coram nobis plenarie persolverunt. Verum cum idem Peteu et sui consanguinei privilegium Salomonis abbatis et conventus Sancti Martini ac capituli nostri super emptione predicte terre confectas (!) restituere prefato decano et Martino curiali comiti debuissent Peteu prefatus ac sui consanguinei ipsas amisisse retulerunt. Unde ubicunque ipsa privilegia vel coram quolibet iudice fuerint demonstrate, nullum penitus optineant robur firmitatis secundum sententiam domini regis memorati. Nos igitur ad instantiam et petitionem utriusque partis super redemptione dicte terre Zamtou prenominatis Laurentio decano et Martino pro prefato F(avo) abbate presentes contulimus litteras nostri sigilli munimine roboratas. Anno Domini M°CC°L° octavo, Chepano preposito, Iurkone cantore, Thoma custode existentibus. [1258. febr. 27.]||
A B C D