Frater Nicolaus, miseratione divina Ostiensis et Velletrensis episcopus, apostolice sedis legatus, universis nobilibus et aliis cuiuslibet conditionis hominibus in comitatu Symigiensi constitutis salutem in Domino sempiternam. Exponente pridem nobis in pleno concilio de mandato nostro Bude solempniter congregato abbate monasterii Sancti Martini de Sacro Monte Pannonie, quod vos nobiles iustas decimas vestras secundum ritum institutionis sanctorum regum et consuetudinem regni olim approbatam a decennio et a pluribus annis antea retroactis dare et solvere non curassetis, nec per vestros iobagiones seu populos dari fecissetis pariter et persolvi, ymo detinuistis contra Dei viventis iniuriam, in preiudicium et non modicum gravamen ecclesie memorate. Quocirca devotioni universitatis vestre, de qua plenam in Domino fiduciam obtinemus, qua fungimur auctoritate committimus et mandamus, quatenus iustas decimas vestras et omnium populorum vestrorum actenus (!) non persolutas eidem domino abbati persolvatis et persolvi plenarie faciatis et, si secus feceritis, et contra iura instituta in solvendis decimis contumaces extiteritis, sicut usque modo dicimini extitisse, dedimus eidem abbati auctoritatem, qua ab apostolica sede fungimur, pariter et concessimus vos et vestros palam et publice excommunicandi, tamquam si nos ipsam excommunicationem in vos et vestros proferremus in persona speciali et ab ingressu ecclesie omnino prohibendi, donec de predictis debitis satisfaciatis. Vobis autem sacerdotibus firmiter iniungimus, quod predictas decimas solvere nolentibus divina celebrare non presummatis (!), alioquin sententia excommunicationis auctoritate nostra per eundem dominum abbatem in vos proferatur. In cuius rei testimonium presentes litteras fieri fecimus et nostri sigilli appensione muniri. Datum Bude, secundo Kalendas Novembris, pontificatus domini Bonifacii pape VIII. anno septimo. [1301. okt. 31.]