A B C D||
Capitulum Iauriensis ecclesie omnibus Christi fidelibus, presentibus pariter et futuris, presentes litteras intuentibus salutem in Domino sempiternam. Ad universorum notitiam harum serie volumus pervenire, quod religiosus vir frater Her(ricus), miseratione divina abbas monasterii Sancti Martini de Sacro Monte Pannonie, pro se et pro fratribus suis, scilicet pro conventu eiusdem monasterii sui, ab una parte, nobilis matrona domina Pendyth, filia Pauli nobilis de Bana, relicta scilicet quondam Stephani, filii Gregorii de Gych ex altera ad nostram presentiam accesserunt. Et, quia eadem domina heredum carebat solatio, erga predictum monasterium Beati Martini devotam habens voluntatem, terrena volens commutare cum celestibus, dictam possessionem Gych, videlicet totam portionem prefati Stephani mariti sui, cum omnibus utilitatibus et pertinentiis suis universis, simul cum ecclesia Sancti Stephani ibidem constructa in eadem plenitudine, quemadmodum ipse Stephanus possidebat, cupiens etiam ipsa domina ultimam voluntatem sepedicti mariti sui adimplere, quem, defunctis Nicolao et Thoma filiis suis, ad prefatum monasterium Sancti Martini cum magno fervore devotionis in conferenda ipsa possessione idem desiderium dicebat habuisse, que quidem possessio insuper remanserat eidem domine in dotem, exceptis quibusdam iugeribus terre, que ibidem pertinent ad usum sacerdotalem ecclesie prenotate, dedit, contulit et donavit supradicto monasterio pacifice perpetuo et quiete possidendam nullo contradictore coram nobis penitus existente. E converso autem antedictus dominus abbas suo et predictorum fratrum suorum nomine in aliqualem concambium eidem domine, ut ipsa usque vitam suam valeat in temporalibus sustentari, dedit et contulit quandam possessionem monasterii sui Apaty vocatam, in comitatu Pestiensi inter possessiones scilicet filiorum Galanch a parte orientali, Iohannis Saap a meridie, nobilium de Patruy ab occidente et nobilium de Bylle ad aquilonem existentem cum omnibus iuris (!) suis pacifice et quiete tenendam et habendam ita videlicet, quod eandem possessionem ipsa domina donandi, legandi pro anima sua et vendendi sive in morte, sive in vita liberam habeat facultatem. Nec hoc pretermittimus, quod sepedicta domina per modum confessionis nobis recitavit, quod super facto dicte possessionis Gych nullam litteram, nulla instrumenta apud se habuisset et, si alique apud ipsam vel apud proximos suos vel alicubi reservarentur, penitus reddidit iuribus carituros ita, ut ubicunque exhiberentur, pro cassis et irritis habeantur. In cuius rei memoriam et perpetuam stabilitatem presentes concessimus litteras ad petitionem partium nostro sigillo roboratas. Datum die sabbato proximo ante dominicam Reminiscere, anno Domini M° CCC° sexto [1306. febr. 26.], magistro Karachyno ecclesie nostre preposito, Mathya lectore, Fabiano cantore, Stephano custode existentibus.||
A B C D