Serenissimo principi domino Carolo, Dei gratia illustri regi Hungarie, suo domino metuendo conventus monasterii Sancti Martini, de Sacro Monte Pannonie orationes in Domino salutares. Litteras vestre serenitatis omni, quo decuit, honore recepimus sub hac forma:||
Carolus, Dei gracia rex Hungarie, fidelibus suis conventui Sancti Martini de Sacro Monte Pannonie salutem et gratiam. Religiosus vir frater Leo abbas de Beel nostre conqueritur maiestati, quod in grande preiudicium monasterii sui magister Paulus de Kamaron non solum tributum portus et fori de eodem Kamaron ad ipsum suum monasterium de iure pertinentia, sed proximis hiis temporibus impacatis ab ipso alienata, detineret indebite occupata, quin etiam eo non contentus, quandam partem dicti tributi fori de piscibus videlicet, qui ad ipsum forum tam feriis tertiis, quam aliis diebus per piscatores et mercatores seu alios homines adducerentur ac inibi venderentur et etiam emerentur semper et ab antiquo hactenus cum ipso principali tributo fori indivisim et insimul recipi consuetum, a suo toto dividere et novo claustro ibidem constructo conferre et perpetuare niteretur, seu etiam iam contulisset et perpetuasset nove ecclesie cum preiudicio et iactura veteris providendo. Super quo fidelitati vestre firmiter precipiendo mandamus, quatenus vestrum mittatis hominem pro testimonio fide dignum, quo presente Deseu, vel Lorandus, filius Nane de Nema, aut Ioannes, filius Petri de Mendzenth, aliis absentibus homo noster, ab omnibus, quibus decet et licet, inquirendo, sciat de premissis omnimodam veritatem. Et post hec prout exinde veritas nobis constiterit nobis fideliter rescribatis. Datum in Alto Castro in festo S. Iacobi Apostoli, anno Domini M° CCC° sexto. [1306. júl. 25.]||
Nos igitur mandatis vestre maiestatis obedientes humiliter, ut tenemur, unacum predicto Lorando, filio Nane de Nema, homine vestro religiosum virum fratrem Nicolaum, sacristam nostrum, ad exequenda premissa destinavimus pro testimonio fide dignum. Qui demum ad nos reversi nobis retulerunt, quod ipsi in vigilia festi Sancti Laurentii martyris nunc preterita [1306. aug. 9.] in comitatu Comaromiensi a nobilibus et ab ignobilibus, aliisque cuiusvis status hominibus, a quibus decuisset, palam et occulte diligenter inquirendo talem comperissent omnimodam veritatem, quod prescriptus magister Paulus quandam partem tributi fori Komaron de piscibus qui ad ipsum forum tam tertiis feriis quam aliis diebus causa forizandi adduci solent, que scilicet pars prius semper mixtim indivisimque cum ipso principali tributo recipi consuevissent novo claustro prenotato noviter contulisset et pro eodem recipi faceret in preiudicium iuris monasterii de Beel supradicti. Datum quarto die diei inquisitionis, anno Domini presignato. [1306. aug. 12.]||
[Hátulján]: Serenissimo principi domino K[arolo] inclitissimo regi Hungarie pro religioso viro domino Leone abbate de Beel contra magistrum Paulum de Kamaron inquisitionis relatorie.