Iohannes episcopus, servus servorum Dei, dilectis filiis ... abbati et conventui monasterii Sancti Martini de Sacro Monte Pannonie, ad Romanam ecclesiam nullo medio pertinentis, ordinis Sancti Benedicti, Iauriensis diocesis, salutem et apostolicam benedictionem. Devotionis vestre precibus benignum inpertientes assensum auctoritate vobis presentium indulgemus, ut possessiones et bona alia mobilia et inmobilia, que liberas personas vestrorum fratrum ad monasterium vestrum mundi vanitate relicta convolantium et professionem facientium in eodem iure successionis vel alio iusto titulo, si remansissent in seculo, contigissent et quo ipsi existentes in seculo potuissent vobis libere erogare, petere, recipere ac etiam retinere licite valeatis sine iuris preiudicio alieni. Nulli ergo omnino hominum liceat hanc paginam nostre concessionis infringere vel ei ausu temerario contraire. Si quis autem hoc attemptare presumpserit, indignationem onmipotentis Dei et Beatorum Petri et Pauli apostolorum eius se noverit incursurum. Datum Avinione, IIII. Kalendas Maii, pontificatus nostri anno quarto. [1320. ápr. 28.]