Nos conventus monasterii Beati Adriani martiris de Zala damus pro memoria, quod ad nostram presentiam accedendo religiosus vir frater Petrus, procurator reverendi in Christo patris et domini domini Nicolai, Dei et apostolice sedis gratia abbatis monasterii Sancti Martini de Sacro Monte Pannonie, cum litteris procuratoriis eiusdem domini abbatis domini sui sufficientibus, necnon et conventus monasterii Sancti Martini iam dicti, qui quidem frater Petrus protestatus extitit viva voce, quod, licet magnificus vir magister Matheus de Trenchinio villam de Vyhel, que alio nomine Regia villa nuncupatur, cum portu super fluvio Vag existente et tributo fori eiusdem ville cum omnibus aliis utilitatibus suis et pertinentiis, item villam Lubow similiter cum portu in predicto Vag constructo ac villam Zeredahel et Pothvarich, spectantes et pertinentes ad ipsam villam Vyhel, cum omnibus utilitatibus suis et pertinentiis universis, necnon terram de Brethe (!) inter Vag et Dudvag existentem, iuxta villam Deyaki et villam Stara et comitatibus Posoniensi et Nitriensi exsistentes etiam cum omnibus utilitatibus suis quibuslibet usque ad hec tempora tenuisset violenter occupatas in iacturam prelibati monasterii Sancti Martini et sue anime non modi cum detrimentum. Et prefatus dominus Nicolaus abbas, dominus suus et conventus prenotati propter ipsius ... pat ... et prefati magistri Mathei tyrannidem multiformem monasterii sui iura prosequi non potuisset, nunc vero quia idem Matheus Deo volente nature debitum persolvisset, idcirco quemlibet et quoslibet generaliter et singulariter ab intromissione, occupatione, emptione et detentione et quavis callida subreptione et quosvis et quemlibet simul et divisim ab alienatione, venditione, inpignoratione et specialiter regiam maiestatem a collatione et perpetuatione seu qualibet distractione possessionum predictarum in preiudicium dicti monasterii Sancti Martini facta vel facienda prohibuisset et prohiberet, ymo in personis predictorum domini abbatis et conventus prefatus frater Petrus prohiberet coram nobis manifeste auctoritate procuratoria supradicta iuris ordine [med]iante, affirmansque etiam et protestatus, quod prefatas possessiones et possessionarias portiones scilicet Vyhel, Lubow, Zeredahel, Potwarich, necnon terram Debrethe ac villas Deaky et Stara vocatas iidem domini sui predicti abbas et conventus vellent requirere iuxta regni consuetudinem loco et tempore oportuno eo, quod super premissis possessionibus et possessionariis portionibus haberent efficacia litteralia instrumenta. Datum in octavis Beatorum Philippi et Iacobi apostolorum, anno Domini M° CCC° vicesimo primo. [1321. máj. 8.]