Nos conventus monasterii Sancti Martini de Sacro Monte Pannonie damus pro memoria, quod venerabilis in Christo pater dominus Iacobus, abbas monasterii de Beel, constitutus personaliter coram nobis suo et ipsius monasterii sui nominibus proposuit protestando, quod tributum portus seu pontis in possessione dicti monasterii sui Arpas vocata super fluvium Raba stantis, quod nunc magister Mauricius detineret et tributum fori de Zyl ad idem monasterium suum efficacium instrumentorum vigoribus pertineret, in quorum etiam dominio pleno et pacifico ante et usque tempora inpacata semper ipsum monasterium extitisset, sed postmodum durantibus ipsis temporibus guerrosis, dum ipsum monasterium incendio, variis vexationibus, aliisque oppressionibus et incomodis quam pluribus subiacens ad extremam pene exinanitionem redactum fuisset, eadem tributa, sicut et alie quam plures possessiones et iura eiusdem monasterii per manus potentes ab ipso monasterio ablata et alienata atque occupata extitissent et adhuc occupata detinerentur in ipsius monasterii et suorum rectorum grande preiudicium et iacturam, adiciens ipse abbas similiter protestando, quod, quamquam ipse sua et ipsius monasterii prepediente penuria ad presens predicta tributa et alia iura ab occupatoribus et detentoribus earumdem requirendi careat facultate, quamprimum tamen Dei pietas huiusmodi inopiam dignabitur relevare, eadem omnia et singula requirere et reoccupare intenderet pro suis viribus, ut tenetur, medio autem tempore prelibatum magistrum Mauricium et alios quoslibet prescriptorum tributorum occupatores et detentores ab eorum ulteriori occupatione et detentione indebita et iniusta ac venditione, alienatione, perpetuatione et alia cuiusvis coloris distractione, regiam etiam maiestatem a collatione et donatione eorumdem quibuspiam personis factis hactenus, aut in posterum faciendis nominibus quorum supra prohiberet et coram nobis prohibuit ministerio vive vocis contradicendo manifeste, petens instanter a nobis super protestatione et prohibitione suis premissis testimoniales litteras sibi dari. Quod et faciendum duximus per presentes sigillo nostro munitas, conmuni iustitia et regni consuetudine requirente. Datum in crastino festi Epiphanie Domine, anno eiusdem M° CCC° XX° II°. [1322. jan. 7.]||
[Hátulján]: Pro religioso viro domino Iacobo abbate monasterii de Beel super protestatione et prohibitione pretextu tributorum de Arpas et de Zyl memorialis.||
[Alul]: Super tributo quod nunc prepositus tenet Premonstratensis.