Capitulum Iauriensis ecclesie omnibus Christi fidelibus, presentibus pariter et futuris, presentes litteras inspecturis salutem in Domino sempiternam. Ad universorum notitiam harum serie volumus pervenire, quod nobilis vir comes Dethylinus, castellanus castri Sancti Martini de Sacro Monte Pannonie ab una parte, religiosus et Deo amabilis vir frater Iohannes prior conventus eiusdem monasterii Beati Martini pro religioso et Deo amabili viro domino Nicolao, abbate dicti monasterii Beati Martini, ex altera ad nostram presentiam accesserunt et predictus comes Dethylinus quasdam possessiones suas Paznan et Durugh wlgariter nuncupatas sub comitatu Iauriensi existentes a Iohanne filio Michaelis dicti Feyes de possessione Rede, comitatus Wesprimiensis et Dominico filio Iohannis filii Primus emptionis titulo comparatas cum ecclesia parochyali in honore Beati Emirici in ipsa possessione Paznan constructa et aliis utilitatibus quibuslibet, videlicet terris arabilibus, vineis, pratis, virgultis ac feneto, ceterisque utilitatibus, quocunque nomine censeantur, sub antiquis metis et terminis ac distinctionibus easdem possessiones Paznan et Durugh contingentibus sine preiudicio iuris alieni dedit, vendidit, tradidit et contulit prefato domino Nicolao abbati et eidem monasterio Beati Martini pro centum marcis denariorum latorum viennensium eidem comiti Dethylino plene persolutis perpetuo pacifice et irrevocabiliter possidendas, tenendas et habendas nullum sibi ius in eisdem possessionibus reservando. Ad maioris etiam cautele remedium prelibatus comes Dethylinus litteras seu instrumenta excellentissimi principis domini Karoli, Dei gratia illustris regis Hungarie et nostras, quibus mediantibus easdem possessiones possederat, in manus eiusdem fratris Iohannis prioris nostri in presentia restituit et assignavit. In cuius rei memoriam, perpetuamque firmitatem presentes concessimus litteras appensione nostri sigilli autentici munimine roboratas. Datum in octavis Omnium Sanctorum anno Domini millesimo CCC° tricesimo, [1330. nov. 8.] magistris Mathya lectore, Georgio cantore, ceterisque fratribus et dominis ecclesie nostre existentibus.