Iohannes episcopus, servus servorum Dei venerabilibus fratribus ... Strigoniensi et ... Colocensi archiepiscopis, eorumque suffraganeis salutem et apostolicam benedictionem. Sacrum Beati Benedicti ordinem non indigne gerentes in visceribus caritatis, ad ea vigilanter intendimus ac opem et efficacem operam impertimur, per que status eiusdem ordinis presentim in remotis partibus, de quibus non potest pro singulis in dicto ordine reformandis ad sedem apostolicam haberi recursus, ad divini nominis gloriam ac ordinis eiusdem honorem prosperis semper successibus affluat, in regulari observantia floreat et tranquillis foveatur eventibus ac multimodis proficiat incrementis. Nuper siquidem pro parte dilectorum filiorum universorum abbatum et priorum abbates proprios non habentium monasteriorum et prioratium ordinis memorati in regno Ungarie consistentium petitionis series nobis exhibite continebat, quod post statutum de capitulis abbatum et priorum proprios abbates non habentium in singulis regnis sive provinciis celebrandis per felicis recordationis Innocentium papam III., predecessorem nostrum editum in concilio generali, pie memorie Honorius papa III. predecessor noster pro salubriori reformatione eorum et observantie regularis et etiam ex eo, quia abbates et priores ipsi de regno predicto ad huiusmodi celebrandum capitulum iuxta statutum prefatum neglexerant convenire ac hii, qui presidere debebant eisdem, cogendi rebelles non videbantur habere aliquam potestatem, dilectis filiis ... de Waraud et de Bols monasteriorum abbatibus dicti ordinis Quinqueecclesiensis et Cenadiensis diocesis suis dedit litteris in mandatis, ut apud monasterium de Modocha, eiusdem ordinis, Colocensis diocesis, illo anno capitulum convocantes abbates et priores dicti ordinis proprios non habentes abbates, tam exemptos, quam non exemptos, Strigoniensis et Colocensis provinciarum, que non consueverant huiusmodi capitulum celebrare, venire ad illud, dummodo impedimento canonico prepediti non essent, monitione premissa per censuram ecclesiasticam, sublato cuiuslibet contradictionis et appellationis obstaculo coartarent et advocatis caritative duobus Cisterciensis ordinis vicinis abbatibus in celebratione capituli Deum habendo pre oculis procederent iuxta statutum concilii memorati eademque censura, que in eo ordinata proinde forent, facerent firmiter observari. Et, ut, que statuta existerent, magis tenerentur memoriter et etiam servarentur, prefatus Honorius predecessor voluit et mandavit huiusmodi capitulum in singulis regnis sive provinciis annis singulis celebrari, concessa eis, qui annis tunc futuris ordinarentur ad presidendum capitulis celebrandis convocandi abbates et priores predictos ad huiusmodi capitula et cogendi rebelles appellatione cessante simili potestate, adiciens, ut, si visitatores, qui essent in eodem ordinati capitulo aliquos exemptos deponendos invenirent, nuntiare sedi apostolice non differrent, in ceteris iuxta formam sepedicti concilii processuri ... licet iuxta mandatum prefati Honorii aliquando in regno predicto celebratum fuerit capitulum supradictum, tamen pro eo, quod ab aliquibus annis citra, certis ex causis huiusmodi capitulum in regno predicto non potuit annis singulis celebrari, dissolvitur ibidem religio ac monasteria et loca dicti ordinis in regno consistentia supradicto plurimum in spiritualibus et temporalibus sunt collapsa. Quare pro parte abbatum et priorum predictorum fuit nobis humiliter supplicatum, ut providere ipsis et eorum ordini super premissis salubriter dignaremur. Nos igitur, qui statum quorumlibet regularium adaugeri ac in dicti Sancti Benedicti ordine virtutes crescere et vitia extirpari, monasteria quoque et loca predicta in eodem regno consistentia spiritualiter et temporaliter auctore Domino reformari cupimus, oportunum in hac parte, prout ex debito nobis incumbit officii pastoralis, remedium adhibere ac eiusdem Honorii predecessoris vestigiis inherere volentes, de fratrum nostrorum consilio auctoritate apostolica statuimus et iussimus expresse, quod deinceps in regno predicto abbatum et priorum predictorum abbates proprios non habentium, tam exemptorum, quam non exemptorum generale capitulum in aliquo monasterio eiusdem ordinis ad hoc apto debeat usque ad apostolice sedis beneplacitum annis singulis celebrari. Et, ut statutum et mandatum nostrum huiusmodi debitum sortiretur effectum, dilectis filiis ... Sancti Martini de Pannonia, ad Romanam ecclesiam nullo medio pertinentis et Sancti Benedicti de Goron monasteriorum abbatibus dicti ordinis, Iauriensis et Strigoniensis diocesis, anno primo et ex tunc singulis annis subsequentibus illis, qui ordinabantur ad presidendum huiusmodi futuris capitulis celebrandis convocandi auctoritate apostolica abbates et priores predictos de regno prefato ad huiusmodi celebrandum capitulum, eosque cessante impedimento legitimo veniendi ad illud monitione premissa qualibet contradictione et appellatione cessantibus per censuram ecclesiasticam compellendi, quibuscunque privilegiis ipsis seu monasteriis et locis eorum sub quavis forma vel expressione verborum ab apostolica sede concessis, que, quo ad hec, in nullo eis suffragari voluimus, nequaquam obstantibus, plenam et liberam auctoritate predicta concessimus potestatem, volentes et auctoritate apostolica decernentes, quod visitatores in huiusmodi capitulo deputandi cum abbates dicti ordinis exemptos deponendos invenerint, sedi apostolice non differant intimare et quod abbates et priores ipsi iuxta statutum eiusdem concilii alias in huiusmodi capituli celebratione procedant et nichilominus hii, qui, ut premittitur, ad presidendum eisdem celebrandis capitulis fuerint deputati, que in huiusmodi capitulis deliberatione provida ordinata extiterint, faciant auctoritate apostolica per censuram eandem sublato cuiuslibet contradictionis et appellationis obstaculo firmiter observari. Quia igitur, sicut fide digna relatio ad apostolatus nostri perduxit auditum, nonnuli ex vobis abbates et priores predictos abbates proprios non habentes in vestris civitatibus et diocesibus consistentes, quominus ad huiusmodi capitulum convenire potuerint impedire ac eis, ne ad illud accederent, inhibere non sine temeritatis audacia presumpserunt, nos cupientes statutum nostrum huiusmodi inconcusse servari ac talibus presumptionibus obviare volentes, fraternitati vestre in virtute sancte obedientie per apostolica scripta mandamus, quatinus ab omni impedimento, molestia et turbatione prefatis abbatibus et prioribus, quominus ipsi ad huiusmodi capitula celebranda annis singulis convenire libere valeant per vos vel alium seu alios, publice vel occulte, de cetero inferendis studeatis penitus abstinere, sicut cupitis indignationem apostolicam evitare. Datum Avinione, X. Kalendas Iulii, [1332. jún. 22.] pontificatus nostri anno sexto decimo.