In nomine Domini Amen. Sub anno nativitatis eiusdem M° CCC° XL° secundo, indictione decima, hora quasi tertia in monasterio Sancti Andree apostoli iuxta Wyssegrad VIII° Idus mensis Iunii [1342. jún. 6.] in mei notarii infrascripti et testium subscriptorum ad hoc vocatorum specialiter et rogatorum presentia venerabiles in Christo patres domini Nicolaus Pecswaradiensis, Quinqueecclesiensis, Iohannes de Colosmonstura, Transsilvanensis, Thomas de Zuburio et Iohannes de Clus, Strigoniensis, Petrus de Sceploc Agriensis diocesum monasteriorum abbates et Nicolaus prior claustralis monasterii Sancti Benedicti iuxta Gron, ordinis eiusdem, sancti ac diffinitores provinciales capituli per prelatos regni Hungarie dicti ordinis in octavis Sancte Trinitatis [1342. jún. 2.] et sequentibus diebus proximis nunc preteritis et in dicto monasterio Sancti Andree celebrati quandam cartam scriptam in papiro exhibuerunt et eam ad legundum michi presentarunt huiusmodi sub tenore:||
Quoniam venerabilis in Christo pater dominus Siffridus abbas monasterii Sancti Benedicti de Gron pro recuperandis alienatis monasteriis infrascriptis, videlicet Cluswar, Bolch, Grab, Byssere et Monyorod, que multo tempore per manus secularium in detrimentum ordinis sancti extiterant occupata in Romana curia apud summum pontificem et etiam in regno Hungarie personales labores atque solicitudines inpendit ac non modicam pecuniarum quantitatem sui monasterii antedicti absque omni ordinis iuvamine expendit occasione monasteriorum predictorum. Sane, cum idem dominus Siffridus in eodem negotio constitutus multorum potentum et baronum livoribus, viarum discriminibus et aliis diversis periculis se exponens eadem monasteria ad statum debitum perduxit, propter quod predicto domino Siffrido et suo conventui sive monasterio memorato de solutione dictarum expensarum debet non inmerito provideri: quare nos Nicolaus Pecswaradiensis, Iohannes de Colosmonstura, Thomas de Zuburio, Petrus de Sceploc et Iohannes de Clus monasteriorum abbates et Nicolaus prior claustralis predicti monasterii Sancti Benedicti, ordinis eiusdem sancti, Strigoniensis, Quinqueecclesiensis, Agriensis et Transsilvanensis diocesum ac diftinitores provincialis capituli dicti ordinis in monasterio Samti Andree apostoli iuxta Wyssegrad in octavis Sancte Trinitatis proximis nunc preteritis celebrati decernimus tenore presentium, sicut et tota universitas predicti provincialis capituli decrevit, ut predicta monasteria superius nominata prefatas expensas, que iuxta declarationem memorati Siffridi abbatis ad quadringentos florenos boni auri et ultra se extendunt, predicto monasterio Sancti Benedicti resarcire integraliter teneantur contradictione qualibet non obstante annis singulis et in terminis infrascriptis, primo videlicet ... abbas monasterii de Cluswar duodecim florenos, item ... abbas monasterii de Grab duodecim florenos, item ... abbas monasterii de Bolch decem florenos, item ... abbas monasterii de Byssere sex florenos, item ... abbas monasterii de Monyorod sex florenos boni auri ut premittitur in festivitatibus Sancti Michaelis archangeli annis singulis, ut superius est expressum, usque ad extenuationem predictorum quadringentorum florenorum sub pena dupli persolvere teneantur monasterio et conventui Sancti Benedicti predictis. Et ut huiusmodi rei memoria firmus habeatur, sub manu publica conscribatur.||
Qua videlicet carta sic exhibita et perlecta predicti domini diffinitores michi mandaverunt et prefatus dominus Siffridus abbas ac prior petierunt sibi per me fieri de predictis omnibus et singulis publicum instrumentum. Actum anno, mense, indictione, die, hora, loco, quibus supra, presentibus venerabilibus patribus dominis Guillermo Sancti Martini Sacri Montis Pannonie, Daniele Sancti Andree de Wyssegrad supradicti, Benedicto Sexardiensis, Nicolao Saladiensis et multis aliis monasteriorum abbatibus et prioribus ac etiam fratribus, qui ad predictum provinciale capitulum convenerant, testibus fide dignis.||
Et ego Nicolaus, natus Arnoldi de Strelicz, clericus Wratislaviensis diocesis, publicus imperiali auctoritate notarius, premissis omnibus et singulis una cum prenominatis testibus presens interfui, eaque de mandato dictorum dominorum diffinitorum et ad requisitionem prefati domini Siffridi abbatis conscripsi et in publicam formam redegi, meoque nomine et signo consuetis consignavi in testimonium omnium premissorum.