(N)os Nicolaus, regni Hungarie palatinus et iudex Comanorum, memorie commendantes significamus tenore presentium, quibus expedit, universis, quod, cum religiosus vir frater Nicolaus, abbas monasterii de Beel, anno dominice incarnationis millesimo trecentesimo quadragesimo primo in congregatione universitatis nobilium Iauriesis et Kamaruniensis comitatuum feria secunda proxima post festum Omnium Sanctorum, [1341. nov. 5.] prope civitatem Iauriensem, per magnificum virum Vyllermum Druget palatinum celebrata consurgendo, duas partes tributi fori et portus de Kamarun, prefato monasterio de Beel pertinere debere vigore efficacissimorum privilegiorum allegasset et per magistrum Donch, comitem Kamaruniensem, occupatas fore proposuisset, ipseque Vyllermus palatinus octavas Strennarum tunc affuturas [1342. jan. 8.] pro termino peremptorie responsionis eidem magistro Donch assignasset et demum diversis dilationum cautelis intervenientibus ipsius cause discussio ad presentes octavas festi Beati Georgii martiris [1343. máj. 1.] ad nostram presentiam sub instrumentorum exhibitionibus devenisset, tandem iam dictis octavis festi Beati Georgii martiris advenfentibus, prelibatus Nicolaus, abbas de Beel, ad nostram personaliter presentiam accedens nobis litteras privilegiales excellentissimi principis Bele, Dei gratia illustris regis Hungarie clare memories tenorem privilegii Sanctissimi Stepliani, regis Hungarorum, transsumptive in se continentes, super ipso tributo fori et portus Kamaruniensis presentavit continentes, quod ipse Sanctissimus rex Stephanus in ipso regno suo katholice fidei seminans fundamentum, dum iam Christiane religionis divina favente clemenfia nova pullularet professio, plurimi viri religiosi Sancti Spiritus dono illustrati ex vicinis provinciis ad ipsum cepissent confluere, quorum usus consiliis ecclesias et monasteria in locis divino cultui aptis construxisset, inter que quidem monasteria in loco Beel vocato in silva Bakan monasterium ad honorem Beati Mauricii martiris construxisset, cui inter ceteras suas donationes tributum fori et portus de Kamerun perpetuo contulisset. Contra quas comes Benedictus et Nicolaus, filius Stephani, servientes ipsius magistri Donch, cum procuratoriis litteris capituli Iauriensis pro eodem domino eorum tenorem litterarum privilegialium domini nostri Karoli, quondam regis Hungarie illustris clare memorie, in privilegiali transsumpto capituli Strigoniensis presentarunt continentes, quod ipse dominus Karolus rex in concambium castri Arwa et tocius districtus Arwa eidem magistro Donch primo castra Chaakturnia et Sturgow vocata simul cum villis et distructu eorumdem castrorum perpetuo contulisset; et dum ipsa castra dictus magister Donch aliquibus temporibus cum eorum tenutis pacifice possedisset, postremo vero consideratione ductus, ut regie curie propinquius posset adherere et regiam clementiam fidelius obsequi valeret, dicta castra eidem domino regi perpetuo restituisset; in quorum concambium ipse dominus rex castrum Kamarun cum villis, possessionibus, tributis et aliis quibuslibet ad ipsum castrum pertinentibus, ipsi magistro Donch et eius heredibus, heredumque suorum successoribus perpetuo contulisset possidendum, salvo iure alieno.||
Qui quidem Nicolaus abbas de Beel, visis tenoribus instrumentorum prelibati magistri Donch et auditis, iustitiam sibi impertiri postulavit tramite iuris observato, allegans et asserens ex ipsa regali donatione predictas duas partes tributi fori et portus de Kamarun in nullo ipsi magistro Donch pertinere, cum ipsius domini Karoli regalis benignitas non aliena iura, sed sua propria regalia contulerit in ipso concambio magistro Donch prenotato, aliena iura salva penitus relinquendo.||
Verum quia prememoratus dominus Karolus rex prefatum castrum de Kamarun cum villis, possessionibus, tenutis, tributis et aliis ad dictum castrum rite et iuste pertinere debentibus ipsi magistro Donch perpetuo contulisse salvo iure alieno reperiebatur, ex ipsaque regali collatione prefate due partes tributi et fori et portus in nullo ipsi magistro Donch pertinere dignoscebantur, eo quod sepedictus abbas ipsum tributum fori et portus adhuc ex donatione Sanctissimi Stephani regis prefato monasterio evidenter pertinere comprobarat: nos una cum baronibus, regnique nobilibus nobiscum iudiciario tribunali adherentibus, agnosscentes ipsum tributum ad iam dictum monasterium de Beel ex premissorum privilegiorum domini Bele regis verissima investigatione debere pertinere, predictas duas partes tributi fori et portus de Kamarun, quas ipse abbas nunc ordine iuris prosequebatur, eidem monasterio eo iure quo sibi comperimus pertinere, adiudicamus perpetuo possidendas tenendas et habendas, salvo iure alieno. In cuius rei memoriam, perpetuamque firmitatem presentes concessimus patentes litteras nostras propter absentiam maioris nostri inpressione minoris sigilli nostri contignatas; presentes autem nostro privilegio sub apensione maioris sigilli nostri emetidando confirmabimus, dum nobis fuerint reportate. Datum in Wyssegrad, quindecimo die termini prenotati, anno Domini millesimo trecentesimo quadragesimo tertio. [1343. máj. 15.]