Nos capitulum ecclesie Albensis memorie commendantes notum facimus presentibus et futuris cartam nostram per presentem, quod vir nobilis magister Iohannes, filius Laurencii filii Baldinii de genere Ratolt, ad nostram personaliter accedens presentiam confessus extitit ministerio vive vocis, quod, licet ipse quandam particulam terre seu possessionis, quam ipse Zaah vocari et sibi hereditario iure pertinere allegasset, iuxta Balatinum in comitatu Zaladiensi prope villam Polaznuk existentem, a capitulo Wesprimiensi et abbate de Beel, anno Domini Mo CCCo XLo septimo [1347.] iuxta regni consuetudinem mediantibus homine regio et nostro testimonio recaptivando reambulaverit et ratione contradictionis in statutione eiusdem sibi facienda per dictos capitulum Wesprimiense et abbatem de Beel contra se ad presentiam regiam citari fecerit et ipsa causa inter eos ab eo tempore usque nunc diversis modis ventilata extiterit, tamen, quia eadem particula terre seu possessionis modo predicto recaptivata, quam ipse Zaah seu Baldunberky vocitasset, ad ipsum capitulum et abbatem de Beel pertinere et intra metas possessionum eiusdem capituli Wesprimiensis Poluznuk et Chopok vocatarum existere ipsumque et suos predecessores nullum ius hereditarium ex multiplici informatione et investigatione habere in eadem cognovisset, ideo nolens ipsos capitulum Wesprimiense et abbatem in detrimentum sue salutis laboribus et expensis ulterius fatigare, ipsam terre seu possessionis particulam modo premisso recaptivatam cum omnibus suis utilitatibus et pertinentiis eidem capitulo ecclesie Wesprimiensis et abbati de Beel remisisset, reliquisset et resignasset, ymo remisit, reliquit et resignavit coram nobis, nullum ius sibi et suis successoribus reservando in eadem. In cuius rei testimonium presentes concessimus litteras, nostri sigilli memorialis munimine roboratas. Datum tertio die festi Asscensionis Domini, anno eiusdem Mo CCCo XLo septimo. [1347. máj. 12.]