Nos comes Paulus, iudex curie excellentissimi principis domini Lodovici, Dei gratia regis Hungarie, memorie commendamus significantes tenore presentium, quibus expedit, universis, quod, cum inter comitem Deseu de Puk actore ab una et religiosum virum dominum fratrum Wyllermum, abbatem ecclesie Sancti Martini confessoris de Sacro Monte Pannonie, in causam atractum parte ex altera super facto metarum quarundam duarum possessionum, videlicet Menfeu ipsius comitis Deseu et Chanak vocatarum eiusdem domini abbatis et ecclesie sue prenotate lis et materia questionis exorta et iusta quam plurium litterarum nostrarum exinde confectarum diversis terminis intervenientibus eo modo, ut, si eedem partes die dominico proximo post festum Beati Andree apostoli nunc proxime preterito [1347. dec. 2.] presentibus Mauritio de Holy pro parte eiusdem comitis Deseu de Puky ut actoris et Iohanne filio Petri de Mendzenth pro parte eiusdem domini fratris Wyllermi abbatis in causam atracti, hominibus regiis et fide dignis testimoniis honorabilis capituli ecclesie Iauriensis, que per idem capitulum Iauriense ad id trasmitti litterarum nostrarum serie postularamus, in factis metarum earundem possessionum Menfeu et Chanak nominatarum concordare possent, tunc seriem concordialis separationis et erectionis metarum possessionum earundem ad octavas Beati Andree apostoli nunc presentes [1347. dec. 7.] in litteris dicti capituli nobis reportare, alioquin in eodem termino iudicium finale assumpmere coram nobis conparere tenerentur, prorogata ad easdem octavas Beati Andree apostoli extitisset, tandem ipsis octavis Beati Andree apostoli adherentibus, Emericus litteratus pro eodem comite Deseu cum procuratoriis litteris eiusdem et Stephanus de Echy pro dicto domino fratre Wyllermo abbate cum procuratoriis litteris eiusdem ad nostram accedentes presentiam eosdemque comitem Deseu et dominum abbatem ex nostra iudiciali permissiva licentia virtute litterarum capituli ecclesie Iauriensis antedicti inter se in facto metarum possessionum Menfew et Chanak nuncupatarum concordasse referentes, easdem litteras capituli Iauriensis nobis presentarunt continentes, quod idem capitulum ecclesie Iauriensis iuxta aliarum litterarum nostrarum continentiam una cum Mauritio de Holy discretum virum magistrum Georgium archidiaconum de Rabakuz, socium et concanonicum eorum pro parte comitis Deseu de Puk, ut actoris, item Iohanne filio Petri de Mendzenth, hominibus domini regis, magistrum Dominicum, similiter socium et concanonicum ipsorum pro parte domini fratris Wyllermi abbatis de Sacro Monte Pannonie ad quedam infra declaranda duxissent pro testimoniis dirigendos, qui quidem homines ipsius domini regis una cum predicti testimoniis eiusdem capituli Iauriensis ad idem capitulum Iauriense redeuntes concorditer retulissent, quod ipsi die dominico proximo post festum Beati Andree apostoli [1347. dec. 2.] ad facies possessionum Menfeu ipsius comitis Deseu et Chanak dicti domini abbatis accessissent, ubi partes per metas hoc ordine erectas inter ipsas possessiones inter se concordassent, quod primo incepissent a parte meridiei circa unam antiquam metam, ubi duas novas metas erexissent angulares, quarum una ville Chanak, alia vero ville Menfew separaret, deinde per bonum spatium eundo versus septemtrionem in latere montis Hegeshygh vocati unam metam pro ambabus villis separantem erexissent; deinde ad eandem plagam procedendo venissent prope villam Menfew ad unam metam antiquam, ubi aliam novam metam pro ambabus villis separantem similiter erexissent; deinde ad eandam plagam procedendo venissent ad duas metas antiquas possessionis eiusdem capituli iuxta viam magnam existentes, ubi duas alias, unam possessioni Menfew ipsius comitis Deseu, aliam ville Chanak predicti domini abbatis separantes erexissent. Nos igitur visis premissarum litterarum dicti capituli Iauriensis continentiis super premissarum duarum possessionum Menfeu et Chanak nominatarum distinctiva separatione et metarum predictarum erectione inter predictas partes facta et habita, eisdem partibus presentes concessimus litteras nostras pendentis et autentici nostri munimine roboratas. Datum Buda duodecimo die octavarum Beati Andree apostoli predictarum, anno Domini M° CCC° quadragesimo septimo. [1347. dec. 11.]