Nos Nicolaus, prepositus ecclesie Strigoniensis, comes capelle et secretarius cancellarius domini regis, memorie commendantes tenore presentium significamus, quibus expedit, universis, quod religiosus vir frater Nicolaus, abbas de Beel, pro se personaliter, et pro suo conventu ab una et Nicolaus, filius Danch, parte ex altera coram nobis constituti, per eundem Nicolaum abbatem in sua et dicti sui conventus persona confessum extitit ministerio vive vocis et relatum, quod ipsi portionem ipsorum totam in tributo Kamarun exurgere consueto habitam ipsos contingentem cum omni plenitudine sui iuris et utilitatum integritate predicto magistro Nicolao, filio Donch, pro octo marcis denariorum Vyennensium quamlibet marcam cum decem pensis conputando et uno usone bono a die medio quadragesime nunc preterite [1349. márc. 20.] usque revolutionem annualem eiusdem diei contulissent, dedissent et collocassent tenendam, utendam et conservandam, ex quibus octo marcis quatuor marcas ipse magister Nicolaus predicto domino abbati iam plene persolvisset, residuas autem quatuor marcas in duobus terminis, scilicet duas marcas in octavis Natalis Beati Iohannis Baptiste [1349. júl. 1.] et alias duas marcas ac dictum unum usonem bonum in octavis festi Omnium Sanctorum [1349. nov. 8.] nunc venturis se se subsequentibus eidem domino abbati persolvere teneretur; magister Nicolaus prenotatus penam dupli incurreret, si aliquem terminorum abmiserit insolutum, ad quod se ipse partes sponte obligarunt coram nobis. Datum Bude, in dominica Iudica, anno Domini Mo CCCo XLo nono. [1349. márc. 29.]