Guido, miseratione divina tituli Sancte Cecilie presbiter cardinalis, apostolice sedis legatus, dilecto in Christo abbati monasterii Sancti Egidii, Vesprimiensis diocesis et preposito ecclesie Iauriensis salutem in Domino. Sua nobis dilectus in Christo abbas monasterii Sancti Martini de Pannonia, Iauriensis diocesis, petitione monstravit, quod, licet sibi ex concessione seu privilegio summorum pontificum et Sancti Stephani regis in comitatu Simigiensi ab incolis et laboratoribus eiusdem de omnibus negotiis, prediis, terris, vineis, segetibus, vetigalibus (!) vinoque hospitum, quod in prediis eorum excressit (!), decimationes omni modo debeantur, prout ex tenore ipsius privilegii per eundem abbatem coram nobis exhibiti vidimus plenius continere, tamen nonnulli ceca cupiditate seducti eiusdem comitatus habitatores et cultores decimationes predictas eidem abbati dare, ut tenentur, contra iustitiam contradicunt et a duobus annis citra etiam contradixerunt in eorum animarum periculum et prefati abbatis dampnum non modicum et iacturam, supplicatione subiuncta, ut eidem super premissis deberemus de oportuno remedio providere. Quia vero ecclesiarum indempnitatibus ex officii nostri debito providere tenemur, eiusdem abbatis supplicationibus inclinati discretioni vestre auctoritate, qua fungimur presentium tenore comitimus (!) et mandamus, quatinus vos vel alter vestrum per vos vel alium seu alios prefatis habitatoribus, laboratoribus et cultoribus auctoritate predicta mandetis, ut prefatas decimationes negociorum, prediorum, terrarum, vinearum, segetum, vetigalium (!), vinumque hospitum, ut tenentur, tam de preteritis, quam presentibus et futuris sub excommunicationis pena eidem abbati solvere debeant integraliter cum effectu, nisi legitimam causam pretendant, quam allegari velint, ad quam allegandam eosdem nominatim et expresse citetis, quos nos etiam presentium tenore citamus, ut nona die post citationem huiusmodi ipsis factam, quem terminum pro primo, secundo et tertio et perhemptorio termino ac monitione canonica assignamus et vos etiam assignetis eisdem, coram nobis in terra Posonii, Strigoniensis diocesis, vel alibi, ubi nos contingerit (!) residere, debeant legitime conparere, alioquin contra eosdem ad promulgationem dicte excommunicationis sententiam et alia graviora procedemus, prout dictaverit ordo iuris et nobis visum fuerit expedire; diem vero huiusmodi mandati seu citationis et formam et quidquid inde feceritis nobis per vestras litteras seu publicum instrumentum harum continentia (!), seriem et tenorem nobis quantocitius poteritis intimare curetis, ut certificari possimus, qualiter in huiusmodi cause negotio procedere habeamus. Has autem litteras nostro sigillo munitas ad cautelam fecimus registrari, de quarum presentatione latori earum, nuntio nostro, iurato in hac parte dabimus plenam fidem. Datum apud Posonium, Strigoniensis diocesis, II. Idus Iunii, pontificatus domini Clementis pape VI. anno octavo. [1349. jún. 12.]