Nos frater Augustinus, Dei [et apostolice] sedis gratia episcopus ecclesie Distillariensis, per venerabilem virum dominum Iohannem, eadem gratia ele[ctum et con]firmatum ecclesie Wesprimiensis, ad officia episcopalia in sua prefata ecclesia et sua d[iocesi] deputatus, significamus tenore presentium, quibus expedit, universis, quod, cum nos in presenti festivitate paschali in dicta Wesprimiensi ecclesia officia et ministeria episcopalia exerceremus, secundo die predicti festi Pasche Domini [1351. ápr. 18.] religiosus et Deo amabilis vir frater Georgius, miseratione divina abbas monasterii Beati Mauricii de Beel per referendum dominum N(icolaum), eadem gratia confirmatuin et consecratum archiepiscopum Strigoniensem, confirmatus, ad nostram veniens presentiam litteras eiusdem domini Nicolai archiepiscopi patentes nobis exhibendo presentavit, in quibus apparebat [lu]culenter, ut, a quocunque idem dominus G(eorgius) abbas vellet, sua auctoritate, recepto [prius] iuramento iuridico, posset consecrari, supplicans nobis humiliter, ut [huius]modi su[am consecrationem] facere dignaremus. Nos igitur invocata Spiritus Sancti gratia [missa in eadem ecclesia Wesprimiensi sol]empniter per nos personaliter celebrata, coram toto clero dicte ecclesie Wesprimi[ensis ceremonies pontifi]ciis et orationibus ad hoc aptis et ordinatis rite peractis, recepto nichilominus [ab eo] iuramento publice, cum devotione, qua licuit, consecravimus eundem, dando sibi iuxta sanctiones canonum omnia insignia pastoralia, ut pote infulam, baculum, annulum et cerotekas, ut sue exemptionis privilegium postulabat. In cuius rei testimonium presentes concessimus nostri sigilli appositione conmunitas. Datum Wesprimii, secundo die predicti Pasche Domini, anno eiusdem millesimo trecentesimo quinquagesimo primo. [1351. ápr. 18.]