Nos Lodovicus, Dei gratia rex Hungarie, memorie conmendantes tenore presentium significamus, quibus expedit universis, quia ex officio nobis incumbenti tenemur invigilare, ne iura ecclesiarum per progenitores nostros fundatarum et dotatarum et specialiter ecclesie Beati Martini de Sacro Monte Panonie per Sanctissimum regem Stephanum fundate, cuius patroni existimus speciales, per eius ministros dispergantur et eedem nostris temporibus ex insolita nostra provisione (in)opprese valeant remanere, una cum prelatis et baronibus regni nostri inito consilio, diligenti et matura deliberatione prehabita duximus decernendum, ut nullus abbatum aut conventus dicte ecclesie Sancti Martini condicionarios manumittere et ab eorum condicione liberos reddere absque nostra licentia et consensu nostro regio habeat facultatem. Si qui autem abbatum dicte ecclesie aut conventus absque nostro consensu id fecissent, acta eorum simul cum condicionariis manumissis revocamus et eorum huiusmodi manumissiones et quaslibet litteras exinde confectas per aliquem abbatem et conventum dicte ecclesie concessas frivolas reddimus et omni stabilitate carituras. Igitur vobis prelatis, baronibus, comitibus, castellanis, nobilibus, civitatibus, liberis villis tam nostris, quam reginalibus et aliorum quorumlibet, earumque rectoribus et generaliter universis cuiusvis dignitatis hominibus in regno suo (!) constitutis, quibus presentes ostendentur, firmiter precipimus per presentes, quatinus condicionarios dicti ecclesie Sancti Martini, qui apud vos et in vestris possessionibus reperti fuerint, eidem ecclesie reddatis et restituatis omni occasione procul mota; aliud nullatenus facere presumpmentes. Datum Bude, in crastino festi Divisionis Apostolorum, anno Domini millesimo CCC° quinquagesimo primo. [1351. júl. 16.]