Excellentissimo principi domino Lodovico, Dei gratia inclito regi Hungarie, domino ipsorum metuendo, capitulum Iauriensis ecclesie orationes in Domino pias et devotas. Receptis litteris prohibitionalibus vestre excellentie per annum generalibus pro domino Wilhelmo abbate de Sacro Monte Pannonie et suo conventu, una cum Michaele filio Pauli de Mendzenth, homine maiestatis vestre, ad quandam prohibitionem infra declarandam faciendam magistrum Blasium socium et concanonicum nostrum, hominem nostrum pro testimonio transmisimus fide dignum. Qui postea ad nos reversi conformiter nobis retulerunt isto modo, quod ipsi feria secunda proxima post festum Epiphanie Domini nunc elapsum [1352. jan. 8.] magistrum Paulum dictum magnum, magistrum cliciorum domini nostri regis, presentibus multis hominibus de provincia et conmetaneis prohibuissent ab illicita erectione metarum in possessionibus ecclesie Sancti Martini et ipse prohiberi noluisset et contra frequentes prohibitiones factas per dictum dominum abbatem et suos familiares, sed semper multas metas et plurimas erigi fecisset, ultimo tamen idem magister Paulus conmisisset, quod ex parte ecclesie ubicunque metas erigi fecisset, tam prope villas Ech, Kysfolw, Olsuk, Taryan et silve Hasag erectas deici et deprimi, deponeret, que iniuste erecte fuissent. Datum in crastino octavarum festi Epiphanie Domini, anno Domini eiusdem M° CCC° quinquagesimo secundo. [1352. jan. 14.]