Nos capitulum Iauriensis ecclesie tenore presentium significamus, quibus expedit, universis, quod accedens ad nostram presentiam frater Petrus, ordinis Sancti Benedicti, procurator et celerarius religiosi viri domini Wilhermi, abbatis monasterii Sancti Martini de Sacro Monte Pannonie, exhibuit nobis litteras patentes excellentissime principisse domine Elyzabet, Dei gratia regine Hungarie, domine nostre metuende, petens nos humili cum instantia, ut easdem uberiorem rei ad cautelam nostris litteris inserendo transcribi faciemus. Quarum tenor talis est:||
Nos Elizabeth, Dei gratia regina Hungarie, memorie commendantes tenore presentium significamus, quibus expedit, universis, quod religiosus vir frater Wyllermus, abbas ecclesie Sancti Martini de Sacro Monte Panonie, ad nostram accedens presentiam, litteras patentes domini Lodovici, eadem gratia regis Hungarie illustris, filii nostri karissimi, tenoris infrascripti nobis presentavit supplicans nobis humili precum cum instantia, ut nos easdem ratas habere et acceptas, presentibusque nostris litteris patentibus de verbo ad verbum transscribi faciendo acceptare dignaremur. Quarum tenor talis est:||
Nos Lodovicus, Dei gratia rex Hungarie, memorie conmendantes tenore presentium significamus, quibus expedit, universis, quod, licet nos pro utilitate et comodo populorum seu iobagionum nostrorum de Echy in comitatu Iauriensi existentium ad predictam possessionem nostram sine preiudicio aliorum fororum conprovincialium, ut ex consuetudine regni nostri regiminis nostri incumbit officio, forum liberum singulis ebdomadis singulis feriis quartis annuerimus celebrandum, tamen, quia ex veridica relatione quorundam innotuit nostre maiestati, ut predictum forum in predicta villa nostra celebrandum foro religiosi viri domini abbatis ecclesie Sancti Martini de Sacro Monte Pannonie in villa sua Zentmarton vocata ab antiquo celebrari consueto preiudicium non modicum et derogamen inferre et generare videtur, ideo nos ad humillimam supplicationem eiusdem domini abbatis mature deliberantes predictum forum in predicta villa nostra singulis ebdomadis singulis feriis quartis celebrandum revocantes, ipsum ad feriam secundam in omni septimana perpetuo celebrandum in eadem duximus annuendo concedendum; populis autem seu hominibus ad dictum forum liberum conveniendis et congregandis hanc contulimus libertatem ex gratia speciali, ut nullius omnino hominum predictos populos vel res aut bona eorundem cuiuscunque conditionis et quarumcunque nationum existant, in omni ebdomada incipiendo a die dominica usque feriam tertiam inmediate sequentem prohibere vel arrestare audeat vel presumpmat, sed quilibet homines vel populi forenses ad predictum forum liberum cum rebus eorum et bonis usque pretacti temporis spacium venire et recedere absque impedimento aliquali liberi habeantur prorsus et securi. Nos itaque universos mercatores et alios homines forenses cum rebus mercimonialibus procedentes assecuramus per presentes, quatenus ad predictum forum liberum in predicta nostra possessione Echy singulis septimanis singulis feriis secundis celebrari conmissum cum omnibus rebus vestris et mercibus secure veniatis et negotiationes vestras in emptionibus et venditionibus exerceatis in eodem, peractisque inibi negotiationibus vestris ad propria vel ad alia loca, que tenditis, pacifice procedatis salvis rebus vestris et personis. Et hec volumus in foris et locis publicis palam facere proclamari. Datum Bude, feria secunda proxima post festum Corporis Christi, anno eiusdem M° CCC° quinquagesimo. [1350. máj. 31.]||
Nos igitur attendentes petitionem eiusdem domini abbatis esse iustam et rationi consonam, easdem litteras domini regis, filii nostri karissimi, iuste et legitime emanatas acceptavimus et acceptamus eisdemque, donationi et collationi fori ac emanationi ipsarum litterarum consensum prebuimus et prebemus et assensum. Nulli ergo hominum presentibus litteris regalibus atque nostris liceat quoquo modo contraire. Quicunque vero ipsis contraierit aut refragator extiterit, is vel illi regiam atque nostram indignationem sentient se incursuros. Datum Bude, die dominico proximo post festum Divisionis Apostolorum, anno Domini supradicto. [1350. júl. 18.[||
Nos igitur iustis et legitimis petitionibus eiusdem fratris Petri procuratoris et celerarii supradicti inclinati predictas litteras patentes, non abrasas, non cancellatas, nec in aliqua sui parte vitiatas, de verbo ad verbum transscribi fecimus, pariter et transsumpmi, sigillo nostro muniendo. Datum feria sexta proxima ante quindenas festi Epiphanie Domini, anno eiusdem M° CCC° quinquagesimo tertio. [1353. jan. 19.]