Ex literis transumptionalibus comitatus Zaladiensis continentibus in se alias literas conventus monasterii Beati Aegidii de Simigio arendatorias seu fassionales, vigore quarum:||
Religiosus vir frater Nicolaus abbas de Zala suo ac conventus sui nominibus tres possessiones suas ac monasterii suis Bornak, Vdvarnak alio nomine Pileskefeu et Nagy-Bok vocatas in comitatu Zaladiensi existentes, cum piscina Piliske vocata, ac omnibus pertinentiis et utilitatibus magistris Stephano et Akus filiis Michaelis condam bani de Piliske, et eorum successoribus pro feudali conservatione et censu annuali dedit et collocavit ea conditione, ut iidem magistri Stephanus et Akus singulis annis octavo die festi Beati Georgii martyris viginti marcas denariorum Viennensium gravis ponderis, ac sex porcos pingues et unum pelliceum bonum dicto fratri Nicolao abbati et suis successoribus in monasterio eiusdem, expeditione superinde recepta, dent, et si in illo termino non praestarent, convincantur in dupplo; si autem neque dupplum persolverent, extunc dictae tres possessiones cum omni plenitudine iuris ac piscina dicto fratri Nicolao abbati et successoribus ac ecclesiae suae redeant et devolvantur possidandae, contradictione eorundem non obstante. Sunt autem literae emanatae feria sexta proxima post dominicam Reminiscere, anno Domini (millesimo) trecentesimo quinquagesimo quarto in conventu. Transumptionales comitatus in oppido Körmend, anno millesimo sexcentesimo quadragesimo secundo.