Nos conventus monasterii Sancti Martini de Sacro Monte Pannonie memorie commendamus significantes per presentes, quibus expedit, universis, quod religiosi viri fratres Petrus et Egidius conventuales monasterii Beati Mauricii de Beel cum sufficientibus litteris procuratoriis ad nostram personaliter accedentes presentiam per modum protestationis nobis significare curarunt querulose, quod, cum predictum monasterium Beati Mauricii in suis proventibus et possessionibus multam sit attenuatum et pauculas habeat possessiones, quibus uti possit pacifice et quiete, religiosus vir et dominus eorum frater Petrus, abbas eiusdem monasterii, paupertates et indigentias ipsius monasterii, ut deberet, non considerans seu attendens, quandam possessionem sepedicti monasterii sui Martunhosafeuld vocatam, cum omnibus suis attinentiis Iohanni dicto Pancel de Koppuan, qui, ut iidem fratres protestantes asserebant, dicto monasterio ipsorum nullius utilitatis existeret, tamquam propter sua servitia conferre et perpetuare in filios filiorum minus iuste niteretur; unde, cum huiusmodi donatio, perpetuatio seu collatio dicte possessionis ex sanctorum regum Hungarie munificentia pertinentis dampnosa sit et inpossibilis, supradicti fratres eidem collationi nec consensum, nec assensum prebendo prefatum dominum Petrum abbatem ab ipsius possessionis Martunhasafeuld alienatione, donatione, seu qualibet perpetuatione, eundem vero Iohannem dictum Pancel specialiter et generaliter alios quoscunque ab occupatione, usuum fructuum perceptione ac quavis detentione prohibuissent et coram nobis suis et dicti monasterii eorum in personis protestando prohibuerunt regni consuetudine requirente. Datum in octavis festi sanctissimi confessoris et pontificis Martini, anno Domini millesimo trecentesimo quinquagesimo quarto. [1354. nov. 18.]