Nos frater Petrus, abbas monasterii Beati Mauricii de Beel, omnibus Christi fidelibus presentes litteras inspecturis salutem in omnium Salvatore. Ad universorum notitiam serie presentium volumus fieri manifestum, quod, quia religiosus vir frater Nicolaus abbas, bone memorie predecessor noster, probi viri, scilicet Stephani, filii Gregorii, de Wazzul nobilis iobagionis eiusdem monasterii exercitualis, fidelissimis et laude dignis meritis in pluribus expeditionibus et exercitibus excellentissimi principis domini Ludovici, Dei gratia regis Hungarie, domini nostri in persona dicti monasterii exhibitis servitiis intuitis, possessionem ipsius monasterii Wazzul dictam eidem Stephano, suisque posteris perpetuo et irrevocabiliter suis litteris mediantibus possidendam et tenendam contulisset et dedisset, ut de eadem tamquam nobilis iobagio exercitualis exercituare teneretur, ipsiusque domini abbatis donationem predictus dominus rex suis litteris mediantibus ratificavit, quadam tamen particula ipsius monasterii in predicta possessione Wazzul tempore donationis ipsi monasterio salva remanente. Unde nos consideratis et circumspectis fidelia servitia ipsius Stephani, filii Gregorii, diversi modo inpensa et in futuro inpendenda, considerantes etiam predecessoris nostri abbatis memorati donationem, eiusdemque domini regis litteris suis mediantibus confirmationem, prout fide conspeximus oculata, possessionem seu terram, que tempore donationis ipsi Stephano facta in eadem possessione Wazzul dicto monasterio pertinente salva permansisset vel excisa, cum universis suis utilitatibus, ambitu et pertinentiis quibuslibet ad eandem possessionem Wazzul applicando, annotato Stephano, filio Gregorii, nobili iobagioni exercituali supradicti monasterii, suisque posteris contulimus, dedimus atque donavimus perpetuo et irrevocabiliter possidendam, tenendam pariter et habendam, nullo dominio in eadem deinceps nobis et dicto monasterio nostro reservato, ita tamen, quod idem Stephanus suique posteri de eadem possessione exercituare velud (!) nobiles sepedicti monasterii teneantur. Et ut huius rei gesta perpetuum robor optineat, presentes concessimus litteras nostras appensione sigilli nostri conmunitas. Datum in festo Beate Marie Magdalene, anno gratie millesimo trecentesimo sexagesimo. [1360. júl. 22.]