Nos capitulum ecclesie Iauriensis memorie commendamus, quod religiosus vir frater Iohannes custos et magister Stephanus notarius ecclesie Sancti Martini Sacri Montis Panonie pro religiosis viris domino Syffrido abbate et conventu ecclesie prenotate cum sufficientibus litteris procuratoriis eorundem parte ab una, Stephanus et Paulus, filii quondam Iacobi iudicis Posoniensis, ex altera coram nobis personaliter constituti, per eosdem concorditer propositum extitit et relatum, quod ipsi in totali causa et articulis cause, que inter ipsos hucusque motis (!) super facto tertie partis tributi in porta Posoniensi, que porta Sancti Michaelis vocitatur, versus Marhek, vulgariter zarrazwam, Teutonice vero duer Mauch vocati, ipsis domino abbati et suo conventui semper debenti et pertinenti, in presentia iudicis curie domini nostri regis ventilata et ad plures terminos protelata seu dilata fuisset, in talem concordie unionem per ordinationem providi viri Iakus, iudicis Posoniensis, devenissent et sese devenisse retulerunt coram nobis, quod in reconpensationem et satisfactionem conservationis, detentionis et perceptionis dicte tertie partis tributi per predictum Iacobum, patrem ipsorum Stephani et Pauli, deinde per eosdem dudum per triginta annos iam preteritos factarum idem Stephanus et Paulus septuaginta florenos aureos legitimi ponderis et valoris prenotatis domino abbati et conventui in quindenis festi Sancti Mychaelis archangeli proxime venturis [okt 13.] sine crastinatione in monasterio Sancti Martini dare et solvere tenebuntur, ut assumpserunt, litteras vero expeditorias facta solutione dictorum septuaginta florenorum annotati procuratores nominibus eorundem ipsis Stephano et Paulo, filiis Iacobi iudicis, nostras et sub nostro sigillo dare tenebuntur, hoc obligamine mediante interiecto et per eosdem Stephanum et Paulum benivole acceptato, quod, si ipsi ipsam solutionem modo premisso in eodem termino coram nostro testimonio super expensas dictorum filiorum Iacobi iudicis tunc illic ducendo facere non curarent vel procrastinarent, ex tunc contra dictos dominum abbatem et suum conventum in duplo memoratorum septuaginta florenorum coram quovis iudice remanerent eo facto, litteris inquisitoriis, prohibitoriis, iudicialibus et aliis quibuscunque per utramvis dictarum partium quovis modo acquisitis seu confectis, per quas vel quarum aliqua posset pretacte concordie in aliquo futuris temporibus derogari, cassis et inanis regiditis, vigoribusque carituris, ymo cassas et inanes reddiderunt coram nobis. Ad que omnia et singula premissorum sepedicti Stephanus et Paulus personaliter se se et dicti procuratores domini abbatis et monasterii prefatorum auctoritate procuratoria eosdem dominos suos nostri in presentia spontanea obligarunt voluntate. Datum sabbato proximo ante festum Beatorum Viti et Modesti martirum, anno Domini Mo CCCo sexagesimo. [1360. jún. 13.]