Nos capitulum ecclesie Vesprimiensis damus pro memoria, quod frater Paulus de monasterio Sancti Martini Sacri Montis Pannonie ad nostram presentiam veniendo vice et nominibus domini Syffridi abbatis et conventus eiusdem loci nobis referre curavit, quod, prout ipsi veri similiter percepissent, Nicolaus, filius Sebastiani, de Kysrouazd portiones possessionarias in eadem Kysrouazd vel alias ubilibet ipsum contingentes et ex novo, ut dicitur, ex speciali gratia regia sibi redditas magistro Petro Rufo de Kapolc vel aliis quibusvis extraneis obligare, vendere aut alios quovis titulo assignare contra priores prohibitiones legitime sibi factas niteretur. Quapropter idem frater Paulus eundem Nicolaum, filium Sebastiani tum contigue circumquaque conmetaneitatis ratione, tum etiam ex aliis certis causis ab ipsarum possessionariarum portionum predicto magistro Petro aut aliis quibusvis obligatione, venditione et alia qualicunque distractione, ipsum quoque magistrum Petrum et alios universos ab earundem in pignus aut in perpetuum receptione, obtentione, occupatione et alia quavis de eisdem se intromissione prohibuit coram nobis contradicendo expresse in personis abbatis et conventus, quorum supra, regni lege dictante. Datum quinto die festi Beati Mathie apostoli, anno Domini millesimo trecentesimo sexagesimo secundo. [1362. febr. 28.]