Nos Nicolaus Kont, regni Hungarie palatinus et iudex Comanorum, memorie commendamus per presentes, quod nos ecclesie Sancti Maurici et abbati ac conventui eiusdem ecclesie de Beel birsagia octoaginta (!) marcarum, super quem predictus abbas ecclesie predicte contra capitulum ecclesie Wesprimiensis coram nobis fuisset convictus, primo propter Deum et eius genitricem Mariam ac propter Sanctum Mauricium sepedicte ecclesie, abbati et conventui eiusdem predictas octoaginta marcas relaxavimus penitus et omnino, necnon ipsius ecclesie litteras nostras expeditorias dedimus et concessimus testimonio presentium mediante. Datum in Baturku, in festo Sanctorum Petri et Pauli apostolorum, anno Domini millesimo trecentesimo sexagesimo quarto. [1364. jún. 29.]