Nos capitulum ecclesie Iauriensis memorie conmendamus, quod religiosus vir frater Iacobus, prior monasterii Sancti Martini Sacri Montis Panonie, ad nostram veniendo personaliter presentiam vice et nominibus venerabilis patris domini Sifridi et conventus loci prenotati protestando dicit, quod, ut ipsis daretur intelligi, medietas possessionis Nezmel vocate, in comitatu Kamariensi existens, ubi tributum super terram, quod dudum in villa Fewzectu predicto monasterio eorum vigore efficacium instrumentorum exigi consueverat, per potentiam Stephani, filii Marcus ad dictam possessionem Nezmel translatum nunc exigeretur, comiti Iakus, iudici civitatis Posoniensis et domine consorti ac liberis esset in proxima (!) devoluta; unde ne occasione huiusmodi devolutionis iuri ipsorum in prefato tributo habito possit preiudicium aliquatinus venerari, ipsum dominum Iakus, dominam consortem ac liberos suos et etiam alios quoslibet ab ipsius tributi statui factione, occupatione et obtentione, aliaque quavis de eodem se intromissione prohiberet contradicendo et contradixit prohibendo coram nobis regni consuetudine mediante. Datum secundo die festi Corporis Christi, anno eiusdem millesimo trecentesimo sexagesimo quarto. [1364. máj. 24.]