Serenissimo principi domino Lodovico, Dei gratia regi Hungarie, domino suo illustri conventus monasterii Sancti Benedicti de iuxta fluvium Goron orationum suffragio devotarum. Litteras vestre celsitudinis proclamatorias patentes pro religioso et Deo devoto viro, domino fratre Paulo, abbate de Beel datas eo, quo decuit honore recepimus reverenter et secundum continentiam earumdem una cum Michaele, filio Ipoliti, de Dersenye, homine vestre maiestatis, fratrem Valentinum, sacerdotem unum ex nobis, ad infrascripta fideliter exequenda pro testimonio nostrum hominem fidedignum duximus transmittendum. Qui demum ad nos reversi nobis concorditer retulerunt, quod ipsi feria quarta, in festo apostolorum Symonis et Iude Beatorum [1366. okt. 28.] in comitatu Borsiensi in Sarlov in foro provinciali, feria quinta inmediate subsequenti [1366. okt. 29.] in Bors similiter in foro provinciali publice verbo vestre regie maiestatis proclamando fecissent divulgare, ut universi mercatores et alii homines postpositis indebitis et insolitis viis novis, per vias veras et prius semper consuetas ad locum tributi prescripte civitatis Baath accedant et tributum, ut tenentur, exsolvant, occasione qualibet procul mota; aliud facere non audentes sub vestre regie indignationis incursum in premissis. Datum feria tertia proxima post festum Omnium Sanctorum supradictum, anno Domini millesimo trecentesimo sexagesimo sexto. [1366. nov. 3.]