Nos conventus monasterii Sancti Martini de Sacro Monte Pannonie memorie commendamus, quod Nicolaus, filius Laurentii et Georgius, filius suus, coram nobis personaliter conparendo proposuerunt ministerio vive vocis in hunc modum, quod ipsi super quibusdam instrumentis litteralibus super possessionibus ipsorum confectis, olim in monasterium Beati Maurici martiris de Beel per suos predecessores ad conservandum datis ac repositis, que ipsi in festo videlicet Sancti Nicolai confessoris [1366. dec. 6.] in presentia religiosi viri domini fratris Pauli, abbatis predicti monasterii de Beel, extra recepissent ab eodem, eidem domino Paulo abbati et deinceps et in antea ceteris presentibus videlicet et futuris abbatibus taliter se, suosque posteros obligassent et obligarent super premissis coram nobis, ut quandocumque temporis in processu ratione premissorum instrumentorum quilibet de ipsorum progenie vel alii quicumque requisitionem facerent, eundem videlicet dominum fratrem Paulum et alios quoslibet prefati monasterii abbates, presentes, ut premittitur, et futuros, impedire et inquietare volendo, ex tunc ipsi Nicolaus sepedictus et Georgius, filius suos ac eorum nepotes ac filii ac posteritas universa protegere et defendere tenerentur propriis eorum laboribus et expensis; ad quod se sepedictus Nicolaus una cum filio suo Georgio spontanea obligavit voluntate. Datum feria secunda proxima post festum [predicti] festi Beati Nicolai confessoris, anno Domini millesimo trecentesimo sexagesimo sexto. [1366. dec. 8.]