Nos comes Stephanus Bubeek, iudex curie serenissimi principis domini Lodovici, Dei gratia incliti regis Hungarie, memorie conmendamus tenore presentium significantes, quibus expedit, universis, quod religiosus vir frater Paulus, abbas de Beel, iuxta continentiam litterarum citatoriarum conventus ecclesie Sancti Martini de Sacro Monte Pannonie simul et recaptivatoriarum in octavis festi Beati Michaelis archangeli in anno proxime transacto preteritis [1366. okt. 6.] in figura nostra iudiciaria personaliter conparendo, contra fratrem Ladizlaum priorem et conventum claustri Beate Virginis, ordinis Predicatorum, de Kamaron easdem litteras conventus Sancti Martini Sacri Montis Pannonie formam cuiusdam tributarie recaptivationis ac citationis exprimentes, dominoque nostro regi rescriptionales, asserens actionem suam contra ipsos fratrem Ladizlaum priorem et conventum claustri predicti proponendam litteris contineri in eisdem, prout per alias litteras nostras exinde confectas edocebamur, nobis demonstrarat, exprimentes inter cetera, quod, cum predictus frater Paulus, abbas de Beel, accepto Iohanne filio Dominici, de Kyseech, homine regio et discreto viro Nicolao, sacerdote capellano et testimonio dicti conventus Sancti Martini in vigilia festi Beati Mathei apostoli et evangeliste proxime preterite [1366. szept. 20.] ad civitatem Kamaroniensem accedendo et quandam partem totalem tributi fori de eadem Kamaron pro fratribus claustri Beate Virginis, ordinis Predicatorum, de piscibus et aliis rebus venalibus inibi recipi consuetam nomine sui iuris et dicti sui monasterii de Beel recaptivando sibi statui facere voluisset et ad scitum et visum Petri moderni ac Iacobi olim iudicum, nec non quam plurium aliorum civium dicte civitatis ad claustrum predictum eundo fratrem Ladizlaum, priorem eiusdem claustri et fratres suos conventuales tunc presentes de eo, utrum huiusmodi recaptivationi et statutioni partis tributarii contradicerent, nec ne, iidem regius et dicti conventus Sancti Martini homines pluries requisitos habuissent, iidem prior et fratres ad ipsorum interrogationem nichil penitus respondere curavissent, quos quidem fratrem Ladizlaum priorem et suum conventum ratione detentionis pretacte partis tributarie contra predictum abbatem de Beel ad predictas octavas festi Beati Mychaelis archangeli tunc venturas [1366. okt. 6.] iidem regius et dicti conventus Sancti Martini homines ad regiam presentiam citavissent.||
Quibus quidem litteris ipsius conventus Sancti Martini de Sacro Monte Pannonie domino nostro regi rescriptionalibus exhibitis, idem frater Paulus, abbas de Beel, rationem detentionis predicte partis tributarie assignari postulavit per Ladizlaum priorem et conventum claustri Beate Virginis de Kamaron prenotatos. Quo percepto frater Iohannes, monachus conventualis dicti claustri, pro predictis priore et conventu cum procuratoriis litteris dicti conventus Sancti Martini de Sacro Monte Pannonie exurgendo responderat eo modo, quod dicta pars tributi fori de Kamaron per ipsum fratrem Paulum, abbatem de Beel, recaptivata ipsis efficacissimorum instrumentorum vigore pertineret, que non ad tunc, sed in termino ulteriori per nos sibi dando exhibere prompti essent et parati.||
Quibus auditis iudicantes conmiseramus, quod predicti frater Ladizlaus prior et conventus dicti claustri Beate Virginis de Kamaron universalia eorum instrumenta, si que in facto dicti tributi haberent confecta, in octavis festi Epiphanie Domini tunc venturas [1367. jan. 13.] contra predictum dominum Paulum abbatem de Beel exhibere tenerentur coram nobis, quibus visis iudicium et iustitiam facere valeremus inter partes in premissis iuris ordine observato.||
Tandem ipsis octavis adherentibus prelibatus frater Paulus, abbas de Beel, personaliter in nostram accededdo presentiam, quasdam duas litteras, unam serenissimi principis domini Karoli, olim incliti regis Hungarie bone memorie, privilegialem sub anno Domini millesimo trecentesimo tricesimo, quinto Idus Martii, regni autem sui anno similiter tricesimo [1330. márc. 11.] sub sigillo suo in partibus Transalpinis casualiter deperdito emanatam et aliam magnifici viri Nicolai filii Geleti, condam regni Hungarie palatini et iudicis Comanorum, patentem nobis demonstravit, in quarum unius, scilicet ipsius privilegialis littere domini Karoli regis quasdam litteras similiter privilegiales condam domini Bele regis Hungarie sub anno Domini millesimo ducentesimo quadragesimo sexto, secundo Idus Novembris, regni autem sui anno undecimo [1246. nov. 12.] emanatas, tenorem cuiusdam privilegii Sanctissimi regis Stephani anno dominice incarnationis millesimo tricesimo septimo [1037.] confecti transscribentes transsumptive in se continentis, serie inter omnia alia per ipsum dominum Sanctissimum regem Stephanum inter alias suas donationes per ipsum ecclesie Sancti Mauricii de Beel factas tributum portus et fori de Kamarun eidem ecclesie perpetuo collatum fuisse adinvenimus manifeste;||
in alterius vero littere, scilicet ipsius Nicolai palatini in anno Domini millesimo trecentesimo quadragesimo tertio, quintodecimo die octavarum festi Beati Georgii martiris [1343. máj. 15.] emanate continentia inter cetera reperiebatur, quod, cum religiosus vir frater Nicolaus, abbas monasterii de Beel, anno dominice incarnationis millesimo trecentesimo quadragesimo primo in congregatione universitati nobilium Iauriensis et Kamaroniensis comitatuum feria secunda proxima post festum Omnium Sanctorum [1341. nov. 5.] prope civitatem Iauriensem per magnificum virum Willernum Drugeth palatinum celebrata exurgendo duas partes tributi fori et portus de Kamaron prefato monasterio de Beel pertinere debere vigore efficacissimorum privilegiorum allegasset et per magistrum Donch, comitem Kamaroniensem, occupatas fore proposuisset, ipseque Willermus palatinus octavas diei Stenarum tunc affuturas [1342. jan. 8.] pro termino peremptorie responsionis eidem magistro Donch assignasset et demum diversis dilationum cautelis intervenientibus ipsius cause discussio ad dictas octavas Beati Georgii martiris in ipsius Nicolai palatini presentiam sub instrumentorum exhibitionibus devenisset, tandem ipsis octavis adherentibus idem dominus Nicolaus palatinus, habitis partium instrumentorum exhibitionibus, ipsum tributum de Kamaron ad iam dictum monasterium de Beel ex tenoribus instrumentorum eiusdem ecclesie certissima investigatione debere pertinere agnoscens, predictas duas partes tributi fori et portus de Kamaron, quas tunc ordine iuris ipse abbas requisivisset, eidem monasterio eo iure, quo sibi conperisset pertinere, adiudicasset perpetuo possidendas, salvo iure alieno.||
Quibus quidem litteris exhibitis et expositis, prelibato fratre Paulo abbate premissa instrumenta per dictos fratres claustri de Kamarun exhibere assumpta per eosdem exhiberi postulante, prefati Ladizlaus prior et frater Iohannes de predicto claustro Kamaroniensi pro se et pro tota communitate fratrum de eodem in nostram exurgentes presentiam, pro premissis exhibere assumptis instrumentis, quasdam tres litteras, unam scilicet condam magistri Pauli de Kamaron privilegialem et aliam magistri Donch comitis de Zolyo patentem et tertiam predicti domini nostri regis similiter patentes nobis demonstrarunt.||
In quarum unius, scilicet ipsius magistri Pauli de Kamaron littere privilegialis sub anno Domini millesimo trecentesimo quinto emanate, [1305.] serie inter cetera reperiebatur, quod ipse magister Paulus ecclesie in honorem Sancte Dei genitricis Marie per ipsum in Kamaronio constructe et fratribus in eadem iugiter famulantibus pro salute et remedio anime sue, fratrum suorum, familiarumque omnium tributum piscium in toto super aqua Wagh et Danubii versus Strigonium vel Budam descendentium sive intra naves, sive iuxta eas in fiscellis seu instrumentis, quod proprie barcas vocarent, tam die fori, quam aliis diebus aut horis quocunque portarentur, a quibus singuli duodecim denarii a primis temporibus exigi et dari consuevissent pro tributo et singuli duo pisces et etiam de aliis piscibus, a quibus minus recipi deberet, dedisset, donasset et contulisset piis et sinceris affectionibus perpetuo tenendum et irrevocabiliter possidendum, preter usones aut pisces, qui ponerentur ad currum et in curru transferrentur et etiam preter pisciferos teutonicos, qui Temletesek appellarentur, pisces ementes et salsantes, quorum tributa pro ipso et pro usu ac sustentatione castri sui et suorum reservasset et pariter retinuisset, sicut alia tributa sua altiora et maiora.||
Relique vero due littere patentes, una scilicet predicti magistri Donch sub anno millesimo trecentesimo trigesimo secundo in Kamaron in festo Nativitatis Beati Iohannis Baptiste [1332. jún. 24.] et altera ipsius domini nostri regis in anno Domini millesimo trecentesimo quadragesimo septimo Bude, feria quinta proxima ante festum Purificationis Beate Virginis [1347. febr. 1.] emanate inter alia predictas litteras dicti magistri Pauli de Kamaron privilegiales de verbo ad verbum transscribendo confirmabant seriose.||
Quarum quidem omnium premissarum litterarum per utrasque partes presentatarum exhibitionibus et expositionibus factis, predictisque partibus sibi in premissis utrimque iuris equitatem per nos impertiri postulantibus, quia prelibatus dominus Sanctissimus rex Stephanus annotate ecclesie Sancti Maurici de Beel tributum portus et fori de Kamaron perpetuo contulisse, annotatus vero frater Nicolaus, condam abbas dicte ecclesie de Beel, duas partes dicti tributi fori et portus de Kamaron a prefato magistro Donch coram ipso Nicolao palatino vigore prescripti privilegii Sanctissimi regis Stephani nomine iuris dicte ecclesie sue iuridice reobtinuisse ex serie premissarum litterarum per ipsum fratrem Paulum abbatem exhibitarum reperiebantur; prelibatus autem magister Paulus de Kamaron ipsis fratribus claustri Beate Virginis de eadem Kamaron solum tributum piscium super aqua Wagh et Danubii versus Strigonium vel Budam descendentium sive intra naves, sive iuxta eas in fiscellis seu instrumentis tam die fori, quam aliis diebus aut horis quocunque portarentur perpetuo possidendum dedisse ex continentiis litterarum ipsorum magistrorum Pauli et Donch ac domini nostri regis adinveniebatur, eedem etiam littere de ipso tributo portus et fori nullam mentionem faciebant: ideo una cum prelatis, baronibus et regni proceribus nobiscum tribunal iudiciale consedentibus prescriptam totalem partem dicti tributi fori de Kamaron, quam sepedictus frater Paulus, abbas de Beel, ut premittitur, a dictis fratribus claustri de Kamaron ordine iudiciario requirebat, eidem fratri Paulo abbati vel sue ecclesie predicte eo iure, quo sibi ex vigore premissorum suorum litteralium instrumentorum dinosscitur pertinere adiudicavimus, reliquimus et conmissimus perpetuo possidendam, tenendam, pariter et habendam, predictum tributum piscium super dictis aquis Wagh et Danubis versus Strigonium vel Budam descendentium annotatis fratribus claustri de Kamaron similiter eo iure, quo eis dinosscitur pertinere perpetuo relinquentes, salvis iuribus alienis, committentes: ut dicti fratres tributum eorum premissum in foro de Kamaron prenotato amodo nequaquam recipere possint et habere, sed in aliis locis condecentibus iuxta seriem instrumentorum eorum premissorum liberam et securam recipi et exigi habeant facultatem. In cuius rei memoriam, firmitatemque perpetuam presentes eidem ecclesie de Beel concessimus litteras nostras privilegiales, pendentis et autentici sigilli nostri munimine roboratas. Datum in Wysegrad, quintodecimo die termini prenotati, anno Domini millesimo trecentesimo sexagesimo septimo. [1367. jan. 27.]