Excellentissimo principi domino Lodovico, Dei gratia inclito regi Hungarie, suo domino gratioso conventus monasterii Sancti Martini de Sacro Monte Pannonie orationes in Christo assiduas et devotas. Litteras vestre excellentie evocatorias anulari vestro sigillo consignatas cum omni honore debito recepimus in hec verba:||
Lodovicus, Dei gratia rex Hungarie, fidelibus suis conventui Sancti Martini de Sacro Monte Pannonie salutem et gratiam. Dicit nobis in religiosus frater Paulus, abbas monasterii de Beel, quod licet venerabilis in Christo pater dominus Colomanus, episcopus Iauriensis, mediantibus aliis nostris et reginalibus litteris super eo, ut quoddam privilegium domini Karoli regis, preclare memorie patris nostre karissimi, metas et pertinentias possessionis Meger vocate in se continentes in specie vel transscripto nobis in curiam nostram transmitteret et decimas vini in territorio montis Nyul Feelkeerth vocato provenientes eidem abbati et suo monasterio eo iure, quo ad ipsum spectare dinosscuntur pacifice percipiendas relinqueret et habendas, ammonitus fuerit et petitus, ipse tamen dominus episcopus pretextu non impletionis premissorum tertia iam vice citatus non venisset ad iudicium, nec misisset, sicut nichilominus nos littere comitis Stephani Bubeek, iudicis curie nostre, iudiciales et alie exinde confecte, nobisque exhibite pleniter informabant, petens nos humiliter idem abbas, ut super hiis sibi de comodiori oportuno remedio providere dignaremur, presertim quia ex ulteriori protelatione privilegialis productionis ac decimarum predictarum per dictum dominum episcopum detentionis non modicum hactenus sibi evenisset et in brevi posset in causa, quam contra Benedictum dictum Woryu haberet, preiudicium evenire. Super quo fidelitati vestre firmiter precipiendo mandamus, quatenus vestrum mittatis hominem pro testimonio fidedignum, quo presente Iohannes, filius Petri, de Kyseech vel Gregorius de Chatar aut Nicolaus, filius Stephani, de Repas sive Stephanus, filius Stephani, de Nogeech, aliis absentibus homo noster evocet prescriptum dominum Colomanum episcopum contra prelibatum fratrem Paulum abbatem supradictum privilegium producturum et super facto occupationis ac detentionis premissarum decimarum cum instrumentis, si que super ipsis habet confecta, indilate rationem redditurum in nostram presentiam ad terminum conpetentem. Et post hoc ipsius evocationis seriem, ut fierit expediens, cum termino assignato nobis fideliter rescribatis. Datum Bude, in festo Beate Katherine virginis et martiris, anno Domini Mo CCCo LXo septimo. [1367. nov. 25.]||
Nos siquidem vestre celsitudinis mandatis obtemperantes effectualiter, ut tenemur, una cum prenominato Iohanne, filio Petri, de Kyseech homine serenitatis vestre, Paulum presbiterum, capellanum nostrum in ecclesia Beate Marie de Olsuk, ad premissa peragenda direximus pro testimonio fidedignum. Qui demum ad nos reversi nobis conformiter retulerunt, quod ipsi feria secunda videlicet infra octavas festi Beate Andree apostoli nunc preterita [1367. dec. 6.] ad possessionem suprascripti domini Colomani, episcopi Iauriensis, Machou nomine, accedentes, ipsum dominum episcopum pretactum privilegium domini Karoli regis metas et pertinentias possessionis Meger exprimentes producturum, rationemque occupationis et detentionis decimarum vini in territorio Feelkerth appellato provenientium prelibato domino Paulo abbati et suo monasterio de Beel attinentium cum instrumentis, si que exinde habet confecta, redditurum indilate contra eundem dominum Paulum abbatem ad octavas festi Epiphanie Domini nunc venturas [1368. jan. 13.] in vestre maiestatis presentiam evocassent. Datum sexto die ipsius evocationis, anno Domini presignato. [1367. dec. 11.]