Nos conventus monasterii Sancti Martini de Sacro Monte Pannonie memorie commendamus, quod vir religiosus dominus Paulus, abbas monasterii Sancti Mauritii de Beel, in nostri presentia personaliter constitutus per modum protestationis nobis propalare curavit vive vocis ministerio, quod, prout ipse verisimiliter percepisset, religiosus vir frater Iohannes, prior claustri de Lewld, ordinis Cartusiensis, non contentus consuetudine recipiendi ius montanum de vineis, in territorio possessionis Nyul vocate dicto claustro noviter a regia maiestate collate sitis, hactenus observata, cum civibus Iauriensibus et aliis hominibus vineas ibidem habentibus super receptione huiusmodi iuris montani seu terragii de dictis vineis provenire debentis, novum quoddam pactum seu conventionem contrahere niteretur, vel etiam contraxisset et litteris mediantibus roborasset vel intenderet roborare, intra cuius quidem possessionis metas et terminos diverse vinee, specialiter autem vinea Petri dicti Zyles de Iaurino in loco Fenes vocato et vinea Nicolai, filii Benche, de Castro Iauriensi super eiusdem locum Fenes, item vitiea olim Bod in loco Henchcufew nuncupato et alia olim eiusdem Bod in valle Henmaal dicta, quarum unam Andreas, filius Nicolai, de Azuan et alteram quidam nobilis de Inse nunc tenere dicuntur, item vinea olim Futus in loco Byzahatara appellate nunc partim apud manus domini Pauli canonici, pridemque succentoris ecclesie Iauriensis, Iohannis dicti Fodur, Ioseph, filii Stephani iobagionis honorabilis capituli ecclesie iam dicte, Dominici, filii Iohannis et Symonis, filii Nicolai, de dicta Nyul, item vinea olim Bartholomei, filii Mykou, in dicto loco Byzahatara nunc apud manus Symonis antedicti, item vinea condam Iohannis, filii Andree, in predicto loco Hencheufew nunc apud manus Valentini, filii Petee, de Iaurino, item vinea olim domini Briccii, prepositi prefate ecclesie Iauriensis, in eodem loco nunc apud manus nepotum eiusdem, item vinea olim Petree in loco Lenchemzere nominato nunc apud relictam dominam Iacobi pistoris de Iaurino, item vinea olim Pauli, filii Iacobi filii Luce, in loco Gerha nuncupato nunc apud magistrum Iohannem, cognomine Gula, canonicum sepedicte ecclesie Iauriensis, necnon vinee olim Ade, filii Frederici et Mychaelis, filii Symonis, nunc apud manus Emerici carpentarii de prefata Nyul, iobagionis prioris supradicti, in monte Choukamaal nomine, item vinea olim Iacobi, filii Luce, in loco Sehsokuro dicto prope metas ville Zenthleurench apud manus nunc Andree, filii Iacobi, de dicta Nyul cognominato Zalag, item vinea Nicolai, filii Laurentii, de dicta Nyul, quam emisse dicitur ab Andrea, filio Thome, vinidatore predicti monasterii sui de Beel, in loco iam dicto existentes et habite et nonnulle alie in terris et possessionariis portionibus eiusdem monasterii sui in prefata possessione Nyul habitis, inter terras seu vineas aliorum mixtim adiacent, [in] quibus olim vinitores et iobagiones ipsius monasterii tunc in eadem Nyul residentes et alii homines possessores earumdem vinearum vina, decim[as] et alia iura consuetudinaria eidem monasterio et suis rectoribus amministare et [solvere] consuevissent; imo ipsarum omnium decimas decimatores et famuli predecessorum suorum et specialiter ad recentem hominum recordationem dominorum Nicolai, Georgii et Petri abbatum dicti monasterii post sese vicissim noviter defunctorum simul cum aliis iuribus exinde debitis pro eodem monasterio percepissent et exegissent, licet postmodum aliorum subsequentium nonnullorum abbatum desidia et negligentia patiente decimatores quidam reverendi in Christo patris domini Colomani, episcopi Iauriensis, easdem decimas pro ipso domino episcopo, officiales etiam super predictam villam Nyul, cum apud manus regias adhuc esset, pro tempore constituti terrarium seu ius montanum de sepedictis vineis de facto violenter et indebite occupassent et usque nunc sic existerent occupata. Unde ipse abbas hac protestatione premissa, ne sibi et monasterio suo vel successoribus suis in posterum taciturnitas preiudicet, aut pro consensu inverti valeat in hac parte, prelibatum priorem absentem ut presentem et per consequens quoslibet fratres et successores suos, ne supra allegati pacti seu alia quavis occasione aliquod terrarium seu ius montanum de prescriptis et aliis quibusvis vineis in terris ipsius sui monasterii inter metas memorate possessionis Nyul videlicet habitis exigere vel recipere debeant, possessores autem earumdem presentes et posteros universos ne huiusmodi terrarium seu ius montanum dicto priori vel suis fratribus, successoribus et claustro, nec non decimas vini exinde provenientes supranotato domino episcopo Iauriensi vel decimatoribus, successoribusve suis aut alteri cuiquam, nisi abbati de Beel et sue ecclesie a modo et deinceps amministrent et solvant, prohibuit contradicendo et premissis omnibus atque singulis contradixit inhibendo publice coram nobis lege et iustitia suadente. In cuius rei evidentiam presentes eidem ad suam petitionem iuri consonam duximus conferendas. Datum in festo Beati Ieronimi presbiteri, anno Domini millesimo trecentesimo sexagesimo octavo. [1368. szept. 30.]