Conventus monasterii Sancti Martini de Sacro Monte Pannonie, omnibus Christi fidelibus presentibus et futuris paginam presentem intuentibus salutem in omnium Salvatore. Consideratio pietatis, equitatisque acies exortamentis iustitie invitatur, ut quelibet ecclesia suis iuribus sortiatur, ut in ea Deo famulantes beneficiis adiuti quiete vivant et placabilem hostiam offere valeant Salvatori. Proinde ad universorum notitiam harum serie volumus pervenire, quod accedentes ad nostram presentiam discretus vir magister Iohannes, cantor ecclesie Iauriensis, vice et nomine venerabilis in Christo patris domini Colomani, Dei et apostolica gratia episcopi eiusdem ecclesie, domini et prelati sui, cum sufficientibus litteris procuratoriis eiusdem domini sui ab una parte, ex altera vero religiosus vir dominus frater Paulus, abbas monasterii de Bel, confessum extitit per easdem partes pariter et relatum, quod, cum inter ipsos dominos Paulum abbatem et episcopum in facto videlicet decimarum vini de quodam loco Felkerth vocato, in territorio possessionis Nyul nuncupate existenti, lis et materia questionis mota fuisset et exorta, diutiusque ventillata, tandem eedem partes amore ducti unionis, ut inter ecclesias ipsorum omnis invidie, ire, rixe et dissceptationis fomes radicibus evolsis sopiretur et eterno pacis favore mutuo amplexerentur, in facto earumdem decimarum ad talem pacis et concordie unionem et conventionem devenissent, quod idem dominus episcopus pro ipsis decimis in loco predicto exigi consuetis singulis annis singulos sexingentos cubulis vini congruentis mensure eiusdem ville Nyul tempore vindemie eidem dicto abbati et suo monasterio dare et solvere tenebitur penam duppli eorumdem sexingentorum cubulorum vini incursurus, si secus fecerit in premissis, nec hoc pretermisso, quod, si idem dominus episcopus ipsam solutionem tribus annis successive expirandis facere non curaret, tunc ipsa decimatio loci prescripti in dominium eiusdem domini abbatis et sui monasterii revolvatur eo facto. E converso autem idem dominus Paulus abbas liti, accusationi et acquisitioni sue ac perceptioni decimalium iurium predictorum cessit et renuntiavit, universas litteras suas causales exinde confectas, sub qualicunque forma verborum emanatas cassas reddendo et inanes ac viribus carituras, prout ad omnia premissa et premissorum singula idem magister Iohannes cantor eiusdem domini episcopi auctoritate procuratoria premissa, idemque dominus Paulus abbas personaliter se et suum monasterium predictum coram nobis obligarunt spontanea voluntate. In cuius rei memoriam, firmitatemque perpetuam presentes litteras nostras privilegiales concessimus alphabeto intercisas, pendentis et autentici sigilli nostri munimine roboratas. Datum in vigilia festi Exaltationis Sancte Crucis, anno Domini millesimo trecentesimo, sexagesimo octavo, [1368. szept. 13.] presentibus religiosis et devotis viris dominis Ladislao abbate, Nicolao preposito, Stephano priore, aliisque fratribus in eodem monasterio nostro Dei iugiter famulantibus.||
A B C