Nos comes Stephanus Bubeek, iudex curie domini Lodovici, Dei gratia regis Hungarie, memorie commendamus, quod religioso viro fratre Paulo, abbate monasterii de Beel, ab una parte et Gregorio litterato de Was in persona nobilis domine relicte magistri Nicolai, filii Donch, de Kamarun cum procuratoriis litteris ipsius domini nostri regis parte ex altera nostri in presentia conparentibus propositum extitit per eosdem, quod sopita atque sedata omni lite et actione, quam dictus dominus abbas in presentibus octavis festi Beati Iacobi apostoli [1368. aug. 1.] iuxta continentiam litterarum evocatoriarum conventus monasterii Sancti Martini de Sacro Monte Pannonie et aliarum exinde confectarum contra eandem nobilem dominam et etiam Petrum, filium suum, ratione cuiusdam partis tributi portus et fori Kamaruniensis ad dictum monasterium suum de Beel pertinentis, in cuius pacifico dominio semper hactenus extitisset, quam per ipsos nobilem dominam et filium eius occupatam fuisse declaraverat, movere habebat, coram nobis ipse partes taliter concordassent, quod eadem domina et dictus filius eius ipsi abbati eandem partem tributariam resignassent et remisissent, memoratusque Gregorius vice et nominibus eorumdem resignavit et remisit pacifice et quiete perpetuo possidendam, quam quidem partem tributi ipse frater Paulus abbas eisdem domine nobili et filio suo a data presentium per anni integri circulum pro quatuor marcis denariorum graves ponderis in festo Beati Michaelis archangeli proxime affuturo [1368. szept. 29.] coram vicecomite et iudicibus nobilium comitatus Kamaruniensis eidem abbati vel suo procuratori legitimo plenarie et libere persolvendis, elapsoque ipso omni circulo domina et filius suus predicti eandem partem tributariam ipsi abbati libere et absque difficultate qualibet resignare tenebuntur, assignasset et locasset, imo assignavit et locavit coram nobis tenere et habere; ita tamen, quod completo tempore prenotato, si ipsi abbati eandem partem tributi eisdem domine et filio suo locare minus comodum videretur, tunc ipse eandem, quibuscunque aliis personis locare seu exponere voluerit vel potuerit, liberam locandi et exponendi habeat facultatem absque omni obstaculo et resistentia domine et sui filii sepedictorum, prout premissa per memoratum Gregorium procuratorem eiusdem partis assumpta extiterunt benivole coram nobis. Datum in Wysegrad tertio die Beati Bartholomei apostolic anno Domini millesimo trecentesimo sexagesimo octavo. [1368. aug. 26.]