Domino Lodovico, Dei gratia inclito regi Hungarie, excellentissimo principi et domino ipsorum gratioso conventus monasterii Sancti Martini de Sacro Monte Pannonie orationes in Virginis Filio assiduas et devotas. Receptis omni, quo decuit, honore litteris excellentie vestre pro religioso viro domino fratre Paulo, abbate monasterii de Beel, ad inquisitiones et prohibitiones inter alia iuxta regni vestri consuetudinem, legitime faciendas per anni circulum generaliter, una cum Iohanne, filio Luce, de Fenyeufeu, homine maiestatis vestre in ipsis litteris nominatim expresso, nostrum hominem, Nicolaum, notarium nostrum, ad infrascripta negotia peragenda pro testimonio destinavimus fide dignum. Qui demum ad nos reversi nobis concorditer retulerunt, quod ipsi feria quarta proxima post octavas festi Beati Michaelis archatigeli proxime preterita [1370. okt. 9.] in comitatu Vesprimiensi procedendo a nobilibus et ignobilibus ac ab aliis cuiusvis status et conditionis hominibus comitatus eiusdem, a quibus decuisset inquiri, diligenter palam et occulte inquirentes talem investigassent et scire potuissent veritatem, quod terra Harazty vocata inter possessiones Koppan predicti domini abbatis et ecclesie de Beel et Seulch, nunc apud manus nobilis domine relicte et Petri, filii magistri Chenyg de Ugud, habita adiacens et distincta metaliter ab eisdem, in qua noviter, videlicet in vere preterito et autumpno presenti populi de dicta Seuch arare et novalia facere incepissent, semper et ab antiquo predicti monasterii de Beel per populos et iobagiones eiusdem de predicta Koppan, nunquam autem per populos de eadem Seulch aut alios quosvis ad castrum Ugud pertinentes possessa, habita et culta fuisset; hiisque sic prescitis iidem vester et noster homines eodem die ad quosdam ex populis sepedicte ville Seulch in facie pretacta terre Harazty tunc actu arantes et novalia facientes accedendo ab ulteriori peraratione, seminatione et quavis occupatione, usuque indebito eiusdem terre verbo vestre serenitatis legitime et manifeste prohibuissent eosdem; illi autem ipsam terram de conmissione et mandato prenotatorum domine nobilis et Petri, dominorum suorum, se intermisisse et eam arasse ac amplius arare velle asserentes, prohibitioni huiusmodi obedire et ab ipsius terre cultura desistere nolle unanimiter respondissent. Datum tertio die executionis processus prenotati, anno Domini millesimo trecentesimo septuagesimo. [1370. okt. 11.]