Excellentissimo principi Lodovico, inclito regi Hungarie, Polonie, Dalmatie etc., domino suo gratioso, conventus monasterii Sancti Martini de Sacro Monte Pannonie orationum in Christo assidua suffragia devotarum. Receptis cum omni debita reverentia et honore litteris excellentie vestre sub sigillo vestro maiori ad inquisitiones et prohibitiones inter alias consuetudinarios ipsius regni vestri Hungarie processus legitime faciendas pro religioso viro domino Paulo, abbate monasterii de Beel, per anni circulum generalibus, iuxta continentiam earundem una cum Mathia, filio Iohannis, de Urs, homine celsitudinis vestre, fratrem Alexium, priorem nostrum, ad infrascripta negotia exercenda transmisimus pro testimonio fide dignum. Qui demum ad nos reversi nobis confirmiter retulerunt, quod ipsi feria tertia proxima ante festum Ascensionis Domini nunc preterite [1373. máj. 24.] in opido Kamaroniensi a civibus seu iobagionibus regalibus de eodem, necnon a nobilibus et ignobilibus comitatus Kamaroniensis ipso die ibidem in foro publico congregatis ac ab aliis cuiusvis status et conditionibus, a quibus inquiri decuisset, hominibus palam et occulte diligenter sciscitando tatem experiri et scire potuissent de infradictis veritatem, quod a feria tertia proxima post festum Conversionis Sancti Pauli apostoli proxime preteritum [1373. febr. 1.] incipiendo usque ad predictam feriam tertiam proximam ante festum Ascensionis Domini et in ipsa feria tertia fratres Predicatores claustri de Kamaron tributum fori piscium per prefatum dominum Paulum abbatem ab ipsis noviter iuris ordine reobtentum denuo potentionaliter, prout prius occupaverant, occupassent et adhuc occupatum detinerent, tributum ipsum in loco dicti fori et super fluvium Wag solito more stantis, partim cum piscibus, partim vero cum denariis exigendo et tollendo in iuris preiudicium et iacturam non modicam domini abbatis et monasterii prescriptorum. Quorum veritate prescita omnes et singulos piscatores, mercatores et alios homines, a quibus ipsi fratres dictum tributum piscium recepissent et recipere niterentur, ne amodo et deinceps eisdem fratribus in loco memorati fori aliquod tributum in piscibus vel denariis persolvere, fratres vero, Georgium, modernum priorem, Michaelem pridem priorem et alterum Michaelem, lectorem claustri prenotati, in foro Kamaroniensi predicto repertos personaliter et per consequens omnes confratres eorum, ne huiusmodi tributum in loco sepedicto ulterius exigere et extorquere debeant, prohibuissent manifeste regni vestri lege requirente. Quibus auditis fratres Georgius prior et alii duo prenotati in suis et aliorum fratrum ipsorum personis respondissent se prohibitioni huiusmodi stare nolle, sed ipsum tributum velle recipere, sicut ante; quapropter ipsi vestre excellentie et noster homines eosdem priorem et fratres rationem premissorum reddituros contra dominum Paulum abbatem prelibatum ad octavas festi Penthecostes nunc venturas [1373. jún. 12.] in vestre maiestatis presentiam citavissent. Datum tertio die diei citationis predicte, anno Domini millesimo trecentesimo septuagesimo tertio. [1373. máj. 26.]