Nos Emericus, regni Hungarie palatinus et iudex Comanorum, vobis officialibus nostris in villa Patana constitutis vel constituendis, quibus presentes ostenduntur, precipimus firmiter et mandamus, quatenus amodo et deinceps pro nulla causa seu iniuria casuali inter iobagiones regales de dicta Patana et populos monasterii de Beel quovis modo habita vel habenda pignora ipsorum populorum repente et absque iuris ordine recipere audeatis; sed, si qui ad [dictum] monasterium pertinentes predictis iobagionibus regalibus iniuriosi extiterint in aliquo vel molesti, tunc ab abbate dicti loci [et] eius officialibus in possessione eiusdem monasterii iustitie complementum ex parte talium requiratur iuris ordine mediante. Qui si ex parte eorumdem congruum indicium et iustitiam exhibuerint, bene quidem, alioquin iobagiones regales conservetis indempnes modo, quo poteritis, meliori. Similiter etiam ex parte ipsorum iobagionum regalium populis dicti monasterii rectum iudicium et iustitiam condecentem, toties quoties necesse fuerit, impendatis nullam eisdem molestiam seu gravamen illicitum irrogantes. Secus pro nostra maiori tribulatione facere non ausuri. Presentes autem post habitam eorundem notitiam presentanti semper reddi volumus ad cautelam. Datum in Vissegrad, feria tertia proxima post festum Sancte Trinitatis, anno Domini millesimo trecentesimo septuagesimo tertio. [1373. jún. 14.]