Nos conventus monasterii Sancti Martini de Sacro Monte Pannonie damus pro memoria, quod Paulus, filius Thome, iobagio monasterii de Beel, coram nobis conpare[ndo] in personis et nominibus conventus eiusdem loci, dominorum s[uorum pro]testatus extitit in hunc modum, quod feria secunda proxima ante festum Penthecostes nunc preterita [1376. máj. 26.] Stephanus dictus Nemeth, iobagio et officialis religiosorum virorum fratrum Stanizlai, prioris et conventus claustri de Lweuld, ex mandato eorundem cum multis suis conplicibus ad terram ville Poliani dicti monasterii de Beel armatis, violentisque manibus preconcepta rancoris malitia venientes, iobagiones ipsius monasterii Beeliensis de dicta Polian ibidem arantes octo bobus eorum cum aratro spoliassent et, quo ipsorum libito placuisset, depulissent eosdem, aratoresque ipsos enormiter verberassent, ex quibus duos, qui ipsos pro scienda causa huiusmodi spolii et bobus eorum repetendis pacifice subsecuti fuissent, crudeliter apprehensos cepissent, captosque vinculatos et de[in ar]estatos, quamdiu ipsis visum extitisset, detinuissent et tandem sub cautione fideiussoria dimisissent nullis culpis exigentibus eorundem, quos quidem boves prior et conventus predicti nec ad mandatum regium per ipsius domini regis et nostrum homines ipsis expositum, nec animadversione evocationis ad iudicium pretextu premissorum eis intimate restituere, neque ex parte violentorum et spoliatorum predictorum aliquam lesis satisfactionem impendere curavissent aut curarent in dicti conventus et monasterii Beeliensis non modicum derogamen ac prefate ville eorum Polian desolationem dampnosam; nunc vero, quemadmodum ipsi conventui daretur intelligi, prior et conventus de Lweuld sepedicti memoratos boves hucusque detinentes et continuis laboribus atteri facientes non aliter reddere intenderent, neque vellent, nisi dominus Paulus abbas et prelatus eorum quandam particulam terre Ethey vocate dicti monasterii de Beel iuxta metas pretacte terre Polian a plaga australi adiacentem, quam hactenus populi de prefata Polian libere possidere, arare et colere consuevissent et in qua adhuc eorum novalia et segetes haberentur, ipsis priori et conventui dominio eius cedens traderet pro ipsorum libitu disponendam. Unde hac protestatione prehabita, ne per factum huiusmodi domini abbatis prelibati iuri sepedicti monasterii valeat in posterum preiudicium aliquod generari, dictus protestans vice et nominibus conventus et monasterii de Beel prescriptorum prenotatum dominum abbatem ab huiusmodi cessione et traditione seu quavis alienatione, priorem etiam et conventum ac claustrum de Lweuld antedictos ac occupatione, usurpatione et quavis indebita obtentione particule terre predicte et pertinentiarum eiusdem quarumcunque factis et faciendis quovis modo prohibuit contradicendo manifeste coram nobis regni consuetudine, communique iustitia suadente, presentium testimonio mediante. Datum quinto die festi Translationis Sancti Martini episcopi et confessoris, anno Domini millesimo trecentesimo septuagesimo sexto. [1376. júl. 8.]||
[Címzése:] Pro religioso conventu ecclesie Beel contra dominum Paulum abbatem eorum ac priorem et conventum claustri de Lweuld super facto cuiusdam particule terre et aliis intranotatis protestatoria et prohibitoria.